水彩班 2018-9 - 靜物寫生

老師先調咗種好迷離嘅顏色打底，仲做埋明暗，一層已經有晒佈局。
呢隻咁迷離嘅顏色，我完全摸不著頭腦，連近似嘅都調唔出。

n次失敗後，我把心一橫，唔學老師嘅用色，調咗隻好明亮嘅底色（我內心有咁明媚咩？）。
右下嗰塊絲巾...，畫到硬硼硼，仲排得好整齊添，但要整齊嘅又唔整齊，個酒樽一如平時，都係邊大邊細，底色唔夠。
我經常都係兩個色塊接唔上，留咗白，但通常呢d位都係唔需要留白嘅。

兩個蘋果幾靚，我覺得後面嗰個仲靚，不過佢唔係主角，而且靚得嚟唔似我想畫嘅蘋果（當唔同品種得唔得呢？），都要畫番暗沈d。
左下個蕃茄本來好鮮明，但唔想佢太突出，於是畫暗咗，但似乎加錯色，瘀晒。
個樽都幾好，不過老師話唔好太綠，要啡番d，
究竟係因為構圖需要，定係因為個樽本身係偏啡色？
如果我係想強調個樽呢？
呢部分我一直都唔明，好似miss ho成日話：『唔好追色』，其實以我調色能力根本追唔到，所以通常都同實物唔同，但miss ho每次改我畫都用番實物本身嘅色，即係點呢？

張相影得太紅添，不過都睇得到背景似山多過似布囉。

個蕃茄洗過，加咗橙色，鮮明番d，柔化咗左邊，小小fade out表示自己係配角。

洗咗吓背景塊布，加強咗蘋果嘅紋，

個樽真係左右唔對稱到一個點....

Shinhan on Saunders Waterford 190g rough 11"x15"

塊布冇得救，或者應該認真練吓畫布。

好早返到課室，老師都好早，因為要set 位，佢已經擺好兩組靜物，唔知點講講吓我話set喺中間好d，咁老師好似又覺得我個講得啱，於是又搬位重新擺。

我唔清楚老師諗住點擺，而老師亦唔係好明我嘅意思，我覺得個效果唔會比佢原本諗嘅好，當然老師冇講乜嘢啦，但我估佢下堂會用番自己個plan。

我好多時都係咁，口多多，意見多多，但其實我只係當傾偈，我一向覺得人人都有自己想法，我講出嚟唔係想影響人，但好多時當對方係比較能夠接受意見，就會畀我影響咗，唔知我只係諗到乜就講乜。唉，咁大個人都仲管唔住自己把口....