冇諗過主角一出場已經死咗，同『人形軟件』一樣。
裡面出場嘅好多人物都係死咗，好似好超現實，但其實內容寫實到不得了，
借主角楊飛生前死後嘅遭遇講出好多社會問題。
第一天
楊飛收到通知，叫佢去殯儀館火葬
但佢等咗一輪，叫到佢號碼嘅時候，決定唔燒住，
佢出咗去四處遊蕩，但似乎佢自己都唔知自己想去邊。
*貧富懸殊
一向都話人死咗世間財富帶唔走，個個都一樣，呢個講法只係窮人酸溜溜嘅自我安慰，有親人有兒女架嘛，唔一定要帶走呀，喺書裡面，就話畀你知，死咗仲係能夠享用世上嘅財富。殯儀館都分平民同有錢人，大家待遇都唔同，但當遇上做官嘅，就連有錢人都要讓路。
雖然話係小說，唔知死者係唔係真有感受，但喺生人嘅世界我哋睇到都真係咁。
第二天
佢返到以前去過嘅地方， 好似佢將會去做補習嘅一個人家、時時同爸爸去食飯嘅食店、仲有佢同前妻住過嘅地方，喺嗰度遇到自殺嘅前妻。
*強拆
小朋友喺拆樓現場做功課，因為嗰度本來係佢屋企，返學時仲喺度，放學已經被夷平，佢唔肯走開，驚父母揾佢唔到，但佢唔知道父母都已經連人帶屋被夷為平地。
*黑錢
有本事有辦法嘅前妻唔想一世平凡，離婚後跟一個商人做起洗黑錢，最後搞到自殺收場。
第三天
前妻要趕去出席自己嘅喪禮，楊光自己繼續四處遊蕩。
佢回顧咗由佢誕生喺鐵路嗰一刻開始，到佢同養父過咗一生。
曾經同親生父母相認，一齊生活咗唔夠一個月。
*家庭矛盾
房地產價錢不斷上升，子女負擔唔到自己嘅物業，結咗婚都要同父母住，出現好多家庭問題。
*官方為包庇掩飾一d事情，不惜犧牲小市民
第四天
佢遇返以前曾經嘅鄰居，一齊去到「死無葬身之地」，見到兩個糾纏幾十年嘅「人」。
*上訪
*窮人好似老鼠咁住地底
第五天
仍然喺「死無葬身之地」，尋找養父
嗰度嘅「人」個個都面有微笑，好似將世上嘅不愉快全部留喺人世。
見返媽媽，媽媽係因為發現河裡面有一堆嬰兒屍體被滅口。
*隱瞞事故死亡人數
*各種有毒食物
*政府部門留難平民，榨取利益
經常提到，火化後家屬領到嘅骨灰，只係亂七八糟唔知邊個嘅骨灰，就好似媽媽家人以為帶住媽媽嘅骨灰去美國，但原來係其他人嘅，所以媽媽就流落咗喺「死無葬身之地」，將來，佢丈夫將會同唔知邊個，或者邊幾個陌生人合葬。
媽媽話養父曾經出現過，又走咗，想去見楊光，佢決定去殯儀館守候，因為所有人終於都會去。
楊光發現，第一日去到殯儀館，見到個工作人員，原來就係養父，佢守候順便做義工。
第六天
楊飛準備去殯儀館搵養父，但遇到鼠妹，一個自殺嘅女仔，後來鼠妹嘅鄰居都嚟咗，話佢知佢男朋友為咗買墓地畀佢而去賣腎。
*賣腎
書裡面描述嘅已經係一個最美滿嘅情況，兩方情願嘅交易，故事中人為咗買墓地畀親人，個社會點解會令到人要走上出賣器官咁冇尊嚴？
第七天
鼠妹有咗墓地，大家都為佢高興，因為佢係第一個能夠脫離死無葬身之地去安息嘅人。
楊飛同大家一齊送佢去殯儀館，去到嗰度，養父見到就認得佢，因為楊飛前妻幫佢整番好五官。
養父繼續留喺殯儀館做義工，楊飛話以後會經常去睇佢，彷彿佢哋已經決定喺嗰個世界繼續生活，不過都係冇選擇，因為佢哋冇墓地，唔可以去安息。
鼠妹去咗墓地安息，佢男朋友就嚟到死無葬身之地，同楊飛回憶佢兩個嘅過去。
男友應該唔會有墓地，所以唔能夠去同鼠妹一齊，永遠留喺「死係葬身之地」，
楊飛話：「那裡沒有貧賤也沒有富貴，沒有悲傷也沒有庝痛，沒有仇也沒有恨⋯那裡人人死而平等。」
平等？的確係冇分貧賤富貴，只係因為富人唔會去呢個地方，只有貧賤冇富貴，造成呢個所謂「平等」。
成本書，就係話：窮，生時要面對種種匪夷所思嘅狀況，死，就死無葬身之地，特別係喺嗰個地方。
明明話冇墓地嘅都會留喺「死無葬身之地」，唔可以燒，咁點解楊飛可以燒？佢應該冇墓地，但佢死咗第一日就有通知佢去燒。
沒有留言:
發佈留言