今次畫 Weasley's嘅 Burrow，鉛筆稿好似太整齊，表現唔到 shabby嘅感覺，係唔係要唔流暢嘅線條？定係點呢⋯？
～*～*～*～*～*～
本來仲考慮要唔要畫黑線，但畫完鉛筆稿發現 d碳粉畀我糊開晒，張紙灰濛濛咁，擦又會擦埋鉛筆線，決定都係畫黑線，畫完先狠狠咁擦乾淨佢。
～*～*～*～*～*～
終於畫完！
 |
| Schmincke Akademie on Saunders Waterford 190g rough 15"x11" |
原圖冇乜光影同細節，諗過自己加，但想像唔到光線會曬到邊度曬唔到邊度，唔想亂加糟蹋咗辛苦畫嘅稿同線。
透視唔係好啱，不過呢間屋係靠魔法撐住㗎嘛，係怪怪哋㗎啦😂
之前兩幅都係用 0.5mm，呢幅太多線，用咗 0.15mm，仲以為買錯咗用唔著添。
唔識 micron嘅號數，買咗 08同 05，以為隔咗三個號碼都算遠，點知原來只係差 0.05mm，我冇咁 pro睇得出分別。😆
我都係比較鍾意本來畫嗰種水彩畫，不過有時試吓第 d嘢都幾好嘅。之前報開嘅水彩班咁耐都冇再開，不過老師自己開素描班，但咁啱喺我唔得閒嘅時間，唉，唯有希望遲吓安排到啦。
我去嗰日好多人，d人又大聲講嘢，好嘈，未試過睇畫展咁嘈。
牽船嘅繩都要有虛實。
天，可以有唔同畫法。
幅畫唔係好深色，但都托到好明亮嘅燈光，所以畫光重點唔係用色深淺，而係『明暗』（定係飽和度？），用晦暗嘅色彩襯出明亮燈光，老師好鍾意各種灰色。
葉叢嘅畫法，唔係渲染，唔識形容，辭窮😛
睇完老師嘅畫，更加肯定，畫得好唔好唔係睇落筆技巧，最重要都係點去處理構圖嘅明暗虛實，如果唔係畫得再似都冇用。
用嘅紙係 Fabriano artistico，似係 cold press。
用色同一般遠暗近明相反，別有洞天嘅感覺。
色彩同明暗都好簡單，但又表現到人嘅姿勢同衣服嘅形態，留白好重要。
究竟要點先做到咁有信心將顏色一撻撻咁嚟畫呢？我畫乜都淨係識暈染，以前以為暈染係水彩最高境界😂，追求順利過渡，唔要見到邊界。😅😅
又或者係：『創作最緊要係勇於面對自己、表達自己。』
今年唔見咗好特色嘅動感畫，係作者用咗唔同風格，我認唔出，定係移咗民？
睇完個畫展，我最鍾意都係老師嘅畫，咁多年嚟，佢每日都有畫 post出嚟，keep住都仲有連我都睇得出嘅進步，一向都覺得已經畫得好好，過一排，又變得更好。
好鍾意 Halloween 嗰種 creepy嘅感覺，我畫畫用色又成日都會搞到好 creepy，所以好啱我畫😁。
真係要黑嘅時候，就發現張紙唔夠黑，似係 charcoal色多 d，mi teintes會唔會有真黑色呢。
可能我上色太細力，無論用白紙定黑紙，顏色都係淡淡咁。
畀我哋參考（臨摹😄）嘅圖片愈發奇怪，今次都係一幅畫，朦朦朧朧咁，睇唔清楚內容，冇深度，冇明暗，😅唔通係一種鍛煉？
呢幅圖有部分係磚牆，阿 sir話要教我畫磚牆，但講完又冇教⋯，係唔係要我起完稿畫埋線，下堂先教？但我好心急㗎，如果有時間，我就會儘快畫完，等唔到下堂。
～*～*～*～*～
今次幅圖都係一個兩層建築物，地下係 bakery同 cafe，千辛萬苦睇到眼都澀，終於畫出個大概，但店舖正門完全睇唔明有 d乜，諗住自己作 d嘢上去，但屋企嘅美術書冇呢種場景，唯有上網搵吓，點知搵搵吓畀我搵到原圖😇，畫家係住喺日本嘅波蘭人，mateusz urbanowicz，佢仲係新海誠嘅創作團隊之一，參與街景創作，佢個姓好似生來就要畫呢 d咁😄。我畫嘅呢一幅，屬於佢嘅 "imaginary japanese storefront"系列，唔係 urban sketching，亦唔係速寫，睇佢嘅 YouTube片，佢話連店名同招牌都係創作出嚟。
我啱啱起完稿，唔知點解唔係好想加黑線，覺得呢幅畫唔係好適合，諗住用木顏色，仲未決定用配合嘅色，定全體用灰色，但都會係落咗水彩先，上好色後加線。同一晚，我睇畫家嘅 YouTube，片裡面佢上完色，話平時會用墨水筆或者 liner畫線，但今次唔想畫到太 detail，所以決定用 8B同 2B graphite pencil，😃咁啱嘅？不過我都唔諗住用鉛筆，我畫呢幅都係灰色夾 d。
～*～*～*～*～*～
今日八號風球，group嘅同學都好勤力畫畫，我都完成咗。
幅畫冇乜顏色變化，不過好多 details。
線條用木顏色，磚牆用灰色，綠色部分用灰綠色，不過唔知係唔係我太細力，最後都要用水彩再畫一次、兩次⋯😂，數唔到幾多次，加到夠色為止。
canopy上面嘅字用咗 acrylic，原畫嘅畫家應該係留白㗎，我見佢畫其他都係留白。可能畫大 d可以留到白啦，但我覺得而家嘅 size啱我畫😁，哈哈哈，解釋唔到。
其實，鐘頂嘅裝飾物係唔係都應該有個影呢？不過原畫冇，我都唔敢隨便加上去。
我覺得畫畫過程中，最難係掌握比例，呢幅圖算係容易，比例唔差得太離譜都唔會影響構圖，而且，雖然係建築物，但好似⋯冇乜透視。阿 sir話下一幅教我畫多點透視，😟好擔心聽唔明阿 sir講乜。
 |
| Schmincke Akademie on Saunders Waterford 300g hp 11"x15" |
～*～*～*～*～*
畫完 post去 group睇吓阿 sir有乜評語，點知佢又係就咁畀個 thumb up emoji就算，然後就將我幅畫 post去自己畫室 Instagram，話係學生作品，well，廣義嚟講，我都算係佢學生嘅😏，雖然佢冇教過我乜嘢。
決定唔再去上堂，呢個班唔係好啱我，都係想睇示範多 d，我比較蠢，要睇到人做先學到嘢，阿 sir淨係畀幅圖我畫，畫完又冇 comment，同我喺屋企自己畫冇分別。
本來都諗住學唔到嘢唔緊要，有同學一齊畫畫都好開心，但呢班又個個畫唔同嘢，好冇 feel😐。
wetcanvas將會喺今年尾或明年初停止營運喇，舊年無端端話我 password錯 login唔到，我都冇再 post過畫，但都 keep住有睇，唉，乜嘢都變晒，世上真係冇嘢係永恆嘅。
呢個 forum本來屬於 artists network，係免費嘅，停止營運又唔係話會消失，仲係 search到同睇到所有舊 post，只係唔可以再 post嘢同 respond，members想繼續 communicate嘅話，可以去 artists network嘅 forum，係收費嘅，不過佢哋會 offer free trial畀 wetcanvas members。
個 forum有好多活躍會員，佢哋一定好難過，雖然可以付費轉去第二度，但一定會流失一 d熟悉嘅人，氣氛都會唔同咗，不過慢慢就會習慣，玩玩吓又會熟番。
以前曾經經常去一個 website嘅 forum，又係忽然唔再營運，原來個 website係有人為興趣自費營運嘅，唔似 wetcanvas本來背後有間公司，可以轉過去，而市面上亦冇其他相同主題嘅 forum，所以一群平時一齊交流嘅人變得好似要各散東西咁，雖然大家可以繼續聯絡，好似用 email咁，但冇咗個可以一齊交流嘅 platform，好可惜。當時仲未流行社交媒體，如果係而家，開個 Facebook page就可以解決，唔知佢哋後來有冇咁做呢？我從來冇 respond過，但因為經常去睇，而且嗰個 website冇咗就真係冇咗，乜都唔會留低，真係幾傷感。
人生就係會經歷各種嘅失去，唯有希望前面會有更好嘅啦。
阿 sir可能見我今期又用咗水彩，終於 offer教我水彩，佢話要教我畫 galaxy，我話我唔想學（好唔聽教），佢問我想學傳統水彩定速寫，我話要學剛畫完呢種，然後佢 send咗張圖去 group。
阿 sir畀我哋嘅圖好多時都係d artistic圖片，呢種圖片一般 d光都唔自然，難畫之餘又好難學到天然光嘅走向同影響，學唔到點睇光線，有時就好似今次咁，係人哋嘅畫，hmph⋯畫人哋嘅畫，😒為乜呢。我哋畫畫時，會將景裡面唔重要嘅嘢 blur咗，一團色就交代咗，我自己知道係乜，會畀番相應嘅色調明暗佢，人哋睇嘅時候點會知道係乜，咁我睇人嘅畫嚟畫，我要點處理呢團顏色，作一樣嘢出嚟，定係照跟一團顏色？
anyway，老師叫畫我就畫啦，都係一種挑戰，報班都係為咁。
呢幅畫嘅作者係一位台灣 urban sketcher，佢叫鄭開翔 Cheng Kai Hsiang。
～*～*～*～*～
呢種畫法係咪即係好似一幅認真嘅 value study？
睇畫勾番 d線出嚟真係唔容易，睇相或者實景會唔會更難？我自己覺得畫畫最難都係起稿，對住一張白紙，無中生有，到上咗第一層色就開始容易，最好玩就係最後嘅 enhancement，每一筆都睇到效果，好有成功感。
我畫好個 outline，但落唔到筆畫暗位嘅斜線，諗到跟住會加水彩，顏色都會表現出嚟，如果有埋斜線，會唔會過咗呢？我決定唔畫暗位嘅線，加咗色先，再畀阿 sir睇吓點。有同學都畫呢幅，post咗鉛筆稿問阿 sir，點知阿 sir好似睇唔到咁，覆晒其他人都冇覆佢，上一幅都係咁，佢 remind咗阿 sir一次，然而都係冇 feedback，點解呢？兩次我都諗住黐住學吓嘢，hmph⋯😒
加完色一睇，我好 surprised，點解顏色可以咁 vibrant嘅？都唔似我平時嘅畫，唔通同畫嘅嘢有關？今次係我第一次畫呢個題材。 |
| Schmincke Akademie on Saunders Waterford 300g hp |
呢種畫法比傳統水彩容易好多，好似填色畫冊咁，每一個色塊都好細，唔需要擔心水嘅問題，唔驚乾咗融合唔到，畫得好輕鬆。
我最滿意樓上嘅窗，畫到裡面嘅暗同外面窗簾嘅反映，不過呢，其實我唔係好明白呢個 area嘅結構，究竟嗰幾塊布係唔係窗簾？點解會喺窗外面？窗外嗰個得幾條鐵嘅框係乜？
有少少後悔太懶，冇留白，又懶得搵 acrylic出嚟😂，所有白色都係用 gel pen，唔夠白。😅
～*～*～*～*～
阿 sir睇到我幅畫，二話不說走去攞電話嚟影低，佢會擺我哋嘅畫喺佢畫室網頁，當作樣版畀人睇佢嘅學生畫作，其實我嘅畫算唔算係佢教出嚟？好似呢幅畫咁，佢一 d comment都冇😶，我問佢有冇嘢要修改或者加，佢話：好好喇，唔使喇。
如果話我冇學到嘢又唔公道嘅，佢介紹到新嘢畀我，好似粉彩，同埋 illustration，學埋呢期睇吓點啦。
上星期係第二期嘅第一堂，我冇上堂，諗住畫阿 sir send去 group嘅圖畫嚟交功課，唔知點解，冇喎😕。後來有同學 request水彩功課（吓？有水彩？um⋯有次上堂時間同上一班重疊咗，見過有同學畫水彩），咁就畫呢幅啦。
新一期有新同學，今期竟然由畫立方體開始，唔係素描，係用 9條線畫個立方體嘅框出嚟，一下子 basic到咁，然而，同學交嘅功課又證明真係有咁嘅需要，I didn't mean to be mean，但佢哋畫個立方體係唔對稱嘅，線條唔直，呢 d唔使阿 sir講，自己都睇到，點會唔改好先交嘅呢？
阿 sir教嘅水彩同我學嘅唔同，係畫晒線然後上色，仲會用排線做暗位嗰種，好 illustration風格，我特登去買咗兩枝 micron liner，唔知點解，我一直都想買，但冇乜用處😐，終於有個 excuse買。
佢只 send咗線條嘅圖，有 d地方睇唔明係乜，有 d難處理，另外，唔知原圖係咩 colour scheme，完全唔知應該用咩色，如果照我平時對呢種風景嘅印象，係好灰黑同暗嘅，考慮咗好耐，我決定畫得明媚 d。
我揀色同調色好弱，以前符 sir會教埋用 A色加 B色，再加少少 C色咁，自己又唔係做唔到，但會係好刻板，所以我 d畫幅幅都差唔多顏色，有 d悶，有時又會用錯色，搞到幅畫好詭異😂。
起完稿，淡淡上一層底色，然後畫線，應該唔係咁嘅，不過我希望畫線嗰時有 d顏色，畫起上嚟會有 feel d。今次張畫紙好唔合作，掃咗水成張發脹鬆晒咁，so weird，以前都未試過咁（唔記得咗用 300g，190g留返畫細畫用）。層底色⋯悶悶哋，幅圖好大部分係石，經過歲月嘅石路同屋，明媚極都有限。
上完一層底色，仍然決定唔到石地部分用乜嘢色（😂黐線），底色只係上咗 payne grey加 raw sienna，或者加 cobalt blue，淡淡咁，好淡好淡⋯，所有唔肯定嘅我都會咁，似有似冇，出事都唔會出大事😂
開始畫線，線條唔錯得，唔可以似平時咁畫細碎嘅線，應該係俐落嘅。最難係石級，一團亂石之餘又要畫出梯級形態，但我畫得唔夠爛，好拘謹😒（一道好拘謹嘅梯級😂）。
畫完線再加色，其實好想用紅色瓦頂，但好似一般都係綠色，我用咗 senellier嘅 turquoise色，Sharp d。
諗唔到牆除咗白色可以係乜嘢色，但咁又變咗成幅畫都係白牆，雖然局部加咗 d環境反射色，但都係好淺色。
幾隻窗好似太深色，變得好觸目咁，但其他部分好難加深，唔通要洗吓佢⋯？
 |
| Cotman on Saunders Waterford 190g rough 15"x11" |
橋嘅倒影都係太深色，hmph⋯冇得救喇冇得救⋯
天都係失敗，舊雲好醜樣😁
隻 turquoise色真係好靚，呢幅畫中唯一嘅明媚。
屋邊嗰條柱（？）應該乜嘢色？
近處嘅石都幾好吖，不過梯級好生硬，佢應該係主角，畀我畫到咁，仲冇乜明暗，👎hmph⋯
我用咗幼線做倒影，唉，真係自作聰明，而家跳晒線咁，好唔夾。
上堂睇吓阿 sir點講。
😝😜😛d post愈嚟愈長😅😂😆
～*～*～*～*～*～*～
我問阿 sir係唔係唔應該用幼線畫倒影，佢話冇問題。講到條河，佢又話倒影唔使畫線，線條只適合用喺暗位，倒影係用顏色表示嘅。（⋯阿 sir你張圖明明有線⋯）
