來自星星的你 별에서온그대

😅我身心發展遲緩，乜都遲過人，幾年前人人都睇嘅劇集，我而家先睇。

唔知我喺youtube睇過乜，忽然彈出咗呢套劇嘅第一集畀我。其實我一向都鍾意呢種題材，只不過當時有其他嘢玩緊，而且身邊個個c9都追緊講緊，我真係唔同佢哋一齊啊！當冇人談論嘅時候，我又唔記得咗佢。

套劇嘅氣氛好好，當然啦，講有錢人，服裝化妝佈景全部都靚（鬧市apartment嘅penthouse，係我嘅夢想），個個都可以專心感情事，除咗殺人嘅二哥，全劇冇壞人，冇心計，又冇人絕症，睇得好輕鬆。對白好風趣，好好玩，有時卡通化咗，誇張咗，但...就係睇得輕鬆囉。

睇到佢叫細佬送完泡菜又叫佢攞番個盒，細佬唔肯再去，晦氣話：『要攞你自己去！』佢即刻話：『既然係你叫我去....』
唉，當你鍾意咗一個人，就係會變成咁白痴，
當你鍾意咗一個人，再唔能夠活得輕鬆，
當你鍾意咗一個人，佢咁啱又鍾意你，世上六十億人，要幾巧合？但咁多人戀愛、結婚，個或然率真係咁高？可想而知，唔少人係退而求次，唔少人係被動地愛。

然而愛情就係咁奇怪，你一直生活得好好，直至遇上呢個人，剎那間就好似以後冇咗佢唔能夠生活咁。

劇情都係走唔出男尊女卑嘅社會倫理，小女人女主角傾慕男主角，個男主角好似好冷酷，其實處處關懷，好細心照顧咗女主角，仲要被誤會嗰種。韓劇日劇大陸劇都好鍾意呢種劇情，香港劇好似好少，諗唔到邊套係咁，可能同社會生態有關，我覺得香港男女地位比較平等，女仔唔鍾意扮演弱者，或者可以話係好勝啦。

其實都敏俊愛嘅係唔係400年前嗰個女仔？
不過，佢話徐宜花唔係初戀，係佢虧欠嘅人，okay，事實我都睇唔到有愛情嘅存在。
可能係佢講過要保護人哋，但結果係人哋為佢擋箭而死，所以一直耿耿於懷，覺得係虧欠。
（講開又講，究竟呢幕點擺平呢？好明顯佢當時冇咗超能力，又畀成村人圍住，佢哋唔只要殺個女仔，係想殺埋佢，後來點呢？）
但亦唔覺有邊個轉折位係佢發現千頌伊值得佢愛。
後來佢話係第一次電梯相遇就鍾意咗千頌伊，但點解？嗰幕佢表現咗d乜嘢能夠令一個喺地球生活咗400年嘅人一見鍾情？well...，輕鬆輕鬆....

仲有呢，都敏俊一直忽冷忽熱咁，將千頌伊玩弄於股掌之間，又成日停止時間偷吻，都係好唔君子嘅行為，不過佢靚仔，個個都想畀佢咁玩弄同偷吻，如果係個猥瑣男，實畀人鬧。

都敏俊竟然打麻雀，😆編劇真係唔覺得破壞形象咩？Anyway ，喺我眼裡就好唔搭調囉🙄
🤔觀乎佢喺十幾集嘅時候用咗停止時間嘅方法幫千頌伊贏啤牌，咁佢打麻雀常勝，同成日食出十三么呢樣嘢⋯⋯，哼哼..佢內心同個正氣外表都唔係好夾。

我對個結局有少少失望，我覺得畀個女主角一個人堅強咁繼續生活落去，繼續做一個國民女神，繼續意氣風發，『佢同我一齊嘅時候已經畀咗我足夠回味一生嘅愛，而家我雖然見唔到佢，但我知道佢喺宇宙某一處仍然係深深咁愛住我。』但偶然抬頭望到天上面嘅星星，眼中仍流露出一剎那嘅期盼同埋落寞，咁個結局仲有餘韻。
而家嘅結局有啲似TVB嘅典型結局，出個字幕話你知「x年後」，點點點😐

咁，而家千頌伊係咪要擔心吓自己要點保養呢？只係幾年後都已經睇到好姐弟樣囉喎，再過多幾年咪好似兩母子咁？

劇情發展好多時會番轉頭畀觀眾睇另一個角度，於是恍然大悟『原來咁！』，交代咗男女主角嘅心態同處境，我覺得幾好。

不合情理嘅地方好多，大情節合理，帶到觀眾情緒就得啦，要輕鬆咁睇。
不過有一幕我真係接受唔到，就係千頌伊畀人由醫院帶走，明明著住醫院衫，喺車上面就變咗著自己衫，仲著埋靴，哎哎哎....究竟係邊個幫佢換衫嘅呢？真係愈諗愈唔舒服...

同一幕都敏俊截住架車係好型，不過突然出現嗰吓有小小生硬，好動畫，但最主要係，點解要用暴力？佢可以同400年前一樣，停住時間，將架車拉番上嚟，mmm....因為，要表現佢man同invincible嘅一面，仲要留低蛛絲馬跡畀千頌伊發現真正救佢嘅人啊。

仲有呢，千頌伊踩唔到brake都冇嘗試過開門跳車，淨係喺度嗌。

男主角...，多數時間都係靚仔嘅，但有時覺得個樣小小奇怪，可能係嗰片留海嘅關係啦，係咪太厚？有一幕佢發燒，千頌伊用毛巾同佢敷額頭，好好笑咁將條毛巾放喺留海上面，唉哈哈哈.....
睇到十幾集，一直都係冇乜表情，啱啱睇到佢幻想幸福生活，笑得好開心，哎唷，即刻跌watt😆，我成日都話，男仔幾型都好，一笑就變傻樣。
雖然表情唔多，但我覺得佢都能夠deliver到每一場戲需要嘅感情，不過...唔知道真係佢『演』咗出嚟，定係我一路跟住劇情而『知道』佢有咁嘅感情。

女主角，靚，係我鍾意嗰種靚，靚得有『重量』😄，不過有時見到眼袋，佢當時應該好年輕，點解會有眼袋？可能做明星好辛苦啩，我成日覺得落眼妝係一種催殘。

韓文『空間移動』幾個字竟然同廣東話一樣！

當時總係覺得李輝京個樣喺邊度見過，後來諗到，原來係似黃宗澤呀！
其實，千頌伊都有時似黃翠如，有時似周麗淇，
都敏俊都好似蔡淇俊啊，不過可能係蔡淇俊模仿佢都唔定，但都要本身有d似先模仿到咁似嘅。


~*~*~*~*~*~*
2 March, 2018


會唔會，都敏俊心裡面虧欠徐宜花嘅，係一份愛？
一個女仔對佢示愛，然後為佢擋箭而死，佢都嚟唔切接受或者拒絕，更遑論回報，所以內心一直覺得欠咗一個交代，直至佢遇上千頌伊，佢想將來不及畀徐宜花嘅愛償還畀千頌伊。
有人話，千頌伊係徐宜花嘅轉世，所以都敏俊會感應到佢有危險，
但我覺得佢第一次救千頌伊，只係巧合，如果話係感應，懸崖嗰次又冇？係靠千頌伊呼喚，佢側耳辨識先揾到。
遊輪嗰次意外嘅預視，唔知想表達乜嘢，遇害嘅都唔係千頌伊。

千頌伊純因為個樣似徐宜花，所以吸引咗都敏俊注意，勾起佢心中嘅歉疚，而千頌伊後來嘅困境，令都敏俊身不由己去幫佢，可能佢不自知，自己幫緊嘅係徐宜花，因為千頌伊嘅處境同徐宜花好相近，400年前救唔到，400年後，離開之前，佢唔想歷史從演。

尋日，睇到拍攝花絮，都敏俊幫千頌伊拉好被，繼而深情凝視，觀眾會想像呢個凝視裡面有幾多情意，心情幾咁千迴百轉，但原來呢個特寫嘅凝視，只係睇住張梳化。

其實只不過係一套電視劇，仲要係咁surreal，劇情本來就經不起推敲，觀眾只要scene by scene咁感動就夠，儘管流過好多眼淚，都唔算係太傻嘅，畢竟演員都流住淚嚟演。
（um....演員會用眼藥水喎...）
（um.....自己睇得開心〝定傷心？〞就得啦。）


~*~*~*~*~*~*~*

6 March 2018

唔係好明白，千頌伊都就快三十歲，拍咗十幾年戲，係一個成熟嘅成年人，
點解經理人公司仲要揾佢阿媽傾合約？
佢阿媽又可以幫佢簽約？

有朝一早，千頌伊喺都敏俊屋企出嚟，畀細佬見到，需要咁驚惶？
細佬仲係高中生，得十幾歲，就當佢畀人撞到，當時嚇咗一吓，但跟住細佬仲係可以好權威咁管佢？
佢又好驚驚咁嘅表現？

係套劇嘅角色設計？定係韓國習慣係咁？