inktober 2019

今年個 prompt好 fit而家嘅社會狀況。

本來諗住配中文書法，用所有 prompt串起成件事，不過諗咗好耐都串唔好內容，書法亦唔掂，所以放棄咗。

網上搵咗圖諗住照畫，marker之外加木顏色水彩，試畫咗一張，感覺唔係幾好。

有諗過今年放棄，但尋晚忽然諗到挑戰一吓人物，用一個 character嚟表達。

不過，想像中係一個卡通化、Q版嘅小肥妹，但創作力同畫功有限，結果畫咗個好普通嘅造型，動作生硬，線條都好唔流暢，希望畫31次可以愈畫愈好啦。

終於個 character係一個似 ballerina嘅小女孩，粉紅裙仔同髮髻，本來都係想畫成 Q版，頭大、身同手腳都瘦長，但畫出嚟唔係好成功，邊畫邊調整啦。

構思中，character代表弱勢，表達會有 d fantasy，有 d反映現實，正就係而家年青人一樣，本來可以生活得好 fantasy，但無奈變咗要面對殘酷嘅現狀。

Laver Cup 20-22 September, 2019

本來冇留意 laver cup，今日唔覺意喺 Instagram睇到一堆男人團抱、跳住氹氹轉，因為 team Europe贏咗。我心諗：『有冇咁 high呀…』，兩隊實力咁懸殊，贏唔到至出奇。well, 做戲做全套啩。

Team Europe	rank		Team World	rank
Nadal	2		Isner	19
Federer	3		Raonic	25
Thiem	5		Kyrgios	27
Zverev	6		Fritz	30
Tsitsitpas	7		Shapovalov	34
Fognini	11		Sock	210

 jack sock因為傷咗一排所以排名跌到咁低，受傷前都曾經去到前十嘅。

睇吓 ranking，完全係大蝦細嘅感覺，點解兩組要咁分呢？跟排名梅花間竹，實力平均 d仲好啦，就叫 team odd, team even囉😂。 

少少奇怪今年仲會有 kyrgios，佢整個態度同受喜愛程度都唔適合呢種 event，我以為會有 Medvedev 同 dimitriv 又冇喎。 

唉，今年對乜都冇興趣，us open都冇心機留意，rafa贏到第19個 grand slam我都開心嘅，同 Federer只相差一個，好大機會超過佢，goat之爭有好大變數，如果 Federer 37歲仲贏到，難道 rafa33、34會唔得？佢有 French open，最多兩年就可以超越 Federer，federer…走到盡頭喇，佢體力差咗，冇以前咁容易佔優勢，佢要打順風波，如果落下風好多時都沉唔住氣（冇數據支持，不過佢一般係接受唔到落後，好多次開局落後就草率咁輸咗場比賽，因為唔想面對）（但都記得08 Wimbledon落後兩局一路追到平手，到第五局仍然一路下風，仍然一直堅持，但我認為嗰次係因為 Wimbledon 同 rafa激起佢嘅鬥志，佢唔想畀rafa喺佢最有把握嘅地方贏到佢。），覺得佢再贏到 gs嘅機會唔大。

水彩花卉風景 Jul 2019 - 6. 瀑布

第六堂嘅畫拖到課程完咗先畫，因為一路都想畫得色彩繽紛 d，throughout個 course都有呢個想法，尤其是呢一幅，上次畫到好悶，monotone咁滯，但又諗唔到點畫，一直拖住。
終於，連最後一堂嘅畫都畫好，趁假期畫埋佢做齊功課，決定用本來用嚟畫燈塔嘅 colour scheme。

天空好好啊，出到我想要嘅效果，我估，係因為我預先濕咗張紙，差不多乾再鋪一次水，於是張紙應該係濕透，顏料就會乾得慢，有時間慢慢鬆開，出到似雲嘅 fluffy感覺。
咁係唔係要厚紙先得呢？應該唔係嘅，用 190紙可以連底都上水，鋪喺唔吸水嘅 surface，有一次畫 poppy都係咁畫，效果一樣。

我嘅 colour scheme同老師差不多，衹係多咗啡同棕黃，內容好豐富，有 raw sienna, burnt sienna同 lacca d'oro，但似乎唔係好睇得出，可能我過度混和咗，變咗一種色啦…

遠處紫灰色部分我都唔肯定係乜，似係最遠嗰層瀑布後再遠嘅樹，如果係樹好似畫得硬咗，不過單睇顏色都算可以，橫向去另一邊顏色同清晰度變化都幾好。

綠色部分最滿意，三組植物顏色分到遠近，不過畫最前嗰組淨係睇住樹，畫到個瀑布塌咗，影響晒成個結構，唉，好失敗…

啡棕色部分重點係水氣，我覺得還可以啦，但 d水好似實咗，似塊布多 d，畫嗰時仲以為好似添…
正中間嗰舊好多色彩架，不過影咗相睇唔到。

畫咗兩次都唔知係咩瀑布，上網一搵就見到，原來就係好出名嘅 iguazu falls，仲有另一幅都係呢個瀑布，it's really magnificent！

Cotman on Saunders Waterford 300g rough 11" x 15"

舊年畫過，顏色單調

https://iceefaery.blogspot.com/2018/05/2018-7.html

水彩花卉風景 Jul 2019 - 10. 划艇

呢班最後一堂，真係快。
圖片中嘅背景混沌一片，原來係山，山上有樹林。老師用偏藍嘅紫藍，我唔係好鍾意，用咗灰紫同綠，乾咗又係變到好淺色，但我覺得睇起嚟迷迷離離咁都幾好，就咁算，唔再加色。

呢幅畫有幾種唔同樣、唔同距離嘅樹，我最鍾意後排左右兩堆，黃黃哋、矇矇哋咁，冇畫到太清楚同硬。
正中兩棵應該係第一配角，老師畫得比較濕，上完色仲灑埋水，我畫就用咗乾筆，唔係刻意，我都唔知點解會咁畫，但既然隻手決定咁畫就咁畫囉，都幾好吖。老師提我哋一定要有留白，如果唔係就會兩舊咁冇生氣，不過我留白多咗，啱啱睇相先發現。
其他 d樹唔係幾好，不過都可以啦…

老師畫水嘅時候，講解畫水嘅技巧，其實都講過好多次，係我自己冇跟住做所以畫唔好，今次我好留心佢點落筆，自己畫時都有跟老師嘅畫法，果然係似咗好多，雖然感覺有d凌亂，但係好咗好多。
因為構圖嘅關係，左下感覺空虛，老師話要加幾筆深色平衡番，我諗我加多咗，唔應該加到填滿個角，顏色都調得唔好，太綠。

上咗咁多個 course，第一次畫人，擔心畫唔好比例，或者姿勢唔自然，所以我起稿好認真。
鉛筆稿畫得幾自然，上色都好小心跟住鉛筆線畫，明暗都睇清楚先落筆，因為面積太細，明暗唔啱位就會爭好遠。
本來覺得最難係兩隻手臂，因為小小嘅範圍有三種明暗，要靠明暗嚟顯示手臂嘅形態，我好小心咁上色，唔知點解三種色唔融合，睇得出一層層，不過我唔敢騷擾佢，分層就分層啦，最緊要分到明暗，如果再搞就一定會更差。
畫完再睇，其實都幾好，好多時我太想顏色自然過渡，會加水或加色修補，結果多數愈修愈唔自然。睇多咗畫展就會發現，原來有d小問題只係自己先會介意，係唔會影響幅畫嘅。（好似係自我安慰咁…）
覺得手臂難畫，所以好小心，結果畫得ok，以為個頭乜都冇好容易，反而畫得唔好，起稿明明都冇問題，上色先覺得唔啱位，但係都冇辨法，改唔到，唯有照畫，好彩都唔算好礙眼。
雖然有d問題，但成個人嘅形態出乎我意料咁係好自然，原來我畫人都唔錯喎，上次畫 wetcanvas都有畫人，都係幾自然，不過同今次一樣，只係背面。

隻船都ok，船蓬裡面都掙扎過，唔啱明暗，好彩結果都自然；
船身邊緣要留白，表示厚度；
枝船杖要留白留出嚟，今次我認真咁留白，冇求其畫成深色，真係乖😊，不過畫完先發現下截幼咗，唉…

成幅畫整體嚟睇都幾好呀，都係因為我有認真起稿，起稿真係好重要。

Cotman on Saunders Waterford 300g rough 15" x 11"

倪匡

今日蘋果日報嘅訪問

【序】

倪匡寫衛斯理慣用第一人稱：「我寫嗰啲嘢太怪誕喇，第一人稱畀人有現實感，到而家仲有傻仔嚟問我真定假！」打了個哈哈。畢竟從小接受衛斯理小說嚴格訓練，我喝了一口烈酒，勉力使自己鎮定下來，做了個無可無不可的表情，倪老再說：「小說梗係假㗎啦！」又再哈哈大笑。我霍地站起來，心想，人類太自大了，自大成這樣，倒是我生平見過最奇怪的事。

我苦笑了一下，攤了攤手，又斟了一杯酒，過了半晌才道：「其實，我都曾經係嗰個傻仔！」
＿＿＿＿＿＿＿＿＿＿＿＿＿＿＿＿＿＿＿＿＿＿

【前言：衛斯理12事】
十多年前，倪匡在街口遇到一對母女，女兒約12歲左右。母親喜孜孜向她介紹：「呢個就係衛斯理喇！」
「我從來冇喺一個細路女臉上見過咁豐富嘅表情，交集住失望、難過、憤怒同難以置信……」倪匡說。「衛斯理點解會係一個又老又肥、衣衫襤褸、撐住枴杖嘅伯爺公？我當場向嗰位母親抗議：『你太殘忍喇！竟然要自己個女咁細個就經歷憧憬幻滅！』」

1.倪匡寫作速度最高紀錄一小時4,500字，看書一樣高速，最高紀錄一天看20萬字，說話速度則比寫字快10倍，最高記錄5秒3句（正常人速度約為每秒3個字）：「太慢我講唔到。」

2.常用字不超過1,500個，自稱用字「接近文盲程度」。金庸的常用字則約4,000個。

3.金庸掌《明報》時，稿費低是出了名。「要加，大家一齊加。」他說要公平，綑綁式一齊加，條數會好大。
一次倪匡喝多了，乘酒意向金庸大呼：「查良鏞，你《明報》賺咁多錢，應該加稿費啦！」金庸只加了百分之五，倪匡氣得怪叫，金庸無奈，說會給他解釋。兩日後倪匡收到金庸來信，詳列清單，說報館開支大、經濟不景，如加稿費勢必引起連鎖反應云云。倪匡不忍，就不再提。

iceefaery :『金庸夾硬將『加人工』同『大家』綑綁，估唔到倪匡會妥協。『大家一齊』呢個講法其實係假公平，付出同收穫成正比先係真正嘅公平，金庸其實係一個韋小寶，有勇無謀嘅衛斯理真係唔係對手。』

4.衛斯理首篇小說《鑽石花》，1963年3月11日刊於《明報》副刊，沿襲《女黑俠木蘭花》套路，屬現代武俠小說，稱不上科幻。

5.衛斯理小說於《明報》發表，「明窗」出版社想出單行本，向倪匡索稿——他攤攤手說：「冇留底喎！」倪匡把原稿全交《明報》，排字房和編輯部沒有人留底，幸一名叫溫乃堅的年青人，致函倪匡稱有齊全套衛斯理小說剪報。感謝上帝。

iceefaery：『所以溫寶裕姓溫？』

6.衛斯理系列有144冊，分別由明窗、利文和勤+緣出版。每本書約9萬字，稿費約為20萬元一本。92年，金庸向于品海出售《明報》股權，之後《明報》拒絕刊登倪匡一篇批評中共的文章，倪匡就說：「既然不願意登，就統統別登吧。」最後的《禍根》只連載了一半，單行本也改由「勤+緣」出版。

7.05年出版的《只限老友》是衛斯理系列最後一部，也是倪匡封筆作。小說寫到一半，倪匡覺得寫作配額已用光，寫不下去，但出版社堅持出版，故改名《只限老友》——讀者看完會咒罵，但朋友便不會。

8.衛斯理在《明報》連載期間，某報向倪匡邀稿，要他創造一個「像衛斯理又不是衛斯理」的人物，這就是原振俠。91年，倪匡移民美國之前把原振俠做個了斷——在浩瀚的宇宙中消失（《天皇巨星》）。新傳奇系列是倪匡授權沈西城撰寫。

9.倪震創辦《YES!》，邀請老父出山寫衛斯理少年時代，催生了「少年衛斯理」。

10.每問倪匡最滿意衛斯理哪本，他總說「本本都鍾意」。這個問題多年前曾有確實答案：《尋夢》，倪匡稱其故事曲折離奇，結局出人意表。書中開場的夢境亦是他從小常做的夢。

11.「明窗」出版的作者簡介，戒酒是真的，「對貝殼的認識已達專家境界」是真的，不懂駕駛也是真的。至於「曾經獨個兒把一部汽車化整為零後再裝嵌為原狀」，求證於倪匡，他說：「冇啲咁嘅事！」「咁係邊個寫？」他笑：「好似係我寫。」

12.民建聯成功爭取北極有企鵝，倪匡早於1965年《地心洪爐》已成功在南極培育白熊。有讀者寫信投訴，倪匡不理；這讀者就天天給他一封信，還越寫越長，倪匡火了，在專欄以特大字體回覆：XX先生：1.南極沒有白熊；2.世上也沒有衛斯理。讀者回兩字：「無賴！」

後來出版商重印，詢倪匡能否改回北極，他不肯：「我鍾意南極，南極比北極神秘！」改為企鵝可以嗎？「企鵝唔過癮嘛！」
＿＿＿＿＿＿＿＿＿＿＿＿＿＿＿＿＿＿＿＿＿＿

【倪匡說】

【衛斯理點搵食？】
冇呀，佢唔使搵食，自然有人畀錢佢，又識得有錢佬多，上至帝王下至巨賈，冇一個佢唔識，哈哈！郭靖黃蓉靠乜嘢搵食？喬峰靠乜嘢搵食？哈哈哈哈哈哈！呢啲根本係屬於武俠小說嘅範疇。冇一樣嘢係合理嘅，冇一樣嘢係現實嘅，因為全部都係幻想。衛斯理根本係一個武俠小說人物嚟㗎嘛，佢有一句說話成日掛喺口唇邊，「我係一個受過嚴格中國武術訓練嘅人」，唔知去邊度受嘅，哈哈哈哈！大家都知道睇呢啲小說冇辦法深究。

佢有一間出入口行，有人幫佢打理，小郭都係出入行嘅職員嚟嘅（係咩？）你睇衛斯理書睇得唔熟囉！白素更加唔使做生意啦，佢老竇係黑社會大佬。

iceefaery：『「我係一個受過嚴格中國武術訓練嘅人」，頭幾次讀到呢句覺得好老土，但佢堅持每本書都講住，就變成一種諷刺咁，襯托咗人物氣質出嚟，所以我一直都覺得衛斯理係一個有勇無謀、自以為好勁嘅八卦老土男人，從來對佢冇幻想。我成日都形住，無論幾無聊冇意義嘅事，堅持做落去都係一種藝術。
如果有人覺得我膚淺，由得我啦；萬一有人覺得我詆毀咗藝術，sorly囉…』

【原振俠與衛斯理】
原振俠同衛斯理好似未試過一齊冒險，好唔容易想到隻故事，梗係分開嚟用啦，拍埋一齊咁嘥，哈哈哈！我靠寫稿搵食㗎嘛！
有人話原振俠同衛斯理，加埋女黑俠木蘭花、浪子高達、高翔、亞洲之鷹羅開，所有人加埋一齊（《復仇者聯盟》？）哈哈哈哈！冇呢個精力，寫得太多。

原振俠嗌衛斯理、白素做「那位先生」、「那位夫人」，點解？好玩囉，故作神秘之嘛。我如果開名嘅話，你哋就唔會問我呢個問題啦！哈哈哈！呢啲完全係故弄玄虛，玩下小花樣，一啲意義都冇。

【衛斯理結局】
衛斯理同白素最後隱居邊度？我都唔知，亦舒講去咗外星（《朝花夕拾》交代衛氏移居到了月球寧靜海）月球有乜嘢好住呀？咁荒涼，應該係去咗一個好美麗嘅外星。

【最喜歡與最不喜歡】
我鍾意嘅角色叫做水葒（於《蜂后》初次出場）佢好聰明伶俐，大話連篇，成日呃人，善解人意，嬌小玲瓏。

最唔鍾意衛斯理，諸事八卦嘅人，唔關你事嘅你都去查，而且查咗毀滅證據，死無對證。

【第一人稱】
因我寫嗰啲嘢太怪誕喇，第一人稱畀人有現實感。到而家仲有傻仔嚟問我真定假，小說梗係假㗎啦。

【男主角叫年輕人】
古龍以前話我，寫武俠小說，寫到主角連個名都冇。我話：『邊一套呀？』佢話：『你好多小說有個主角叫做年輕人！』我話：『冇㗎，姓年，叫做輕人。』古龍傻咗！我寫嗰陣冇諗呢啲，俾佢一講，我至靈機一動。姓年叫輕人有乜問題？好似有啲人問我白老大叫乜嘢名，我話姓白叫老大囉！咁簡單都唔知！後嚟古龍叫我寫兩兄妹，一個叫牛肉湯，一個叫牛肉麵！

【著作等身容乜易！】
我朋友話我有一個怪行為，全世界作家唯一一個唔存自己嘅作品嘅就（只得）你，哈哈哈，出版社攞啲書嚟，俾人攞晒，《老貓》我攞咗幾多本都冇喇，打個電話畀蘇總（明報出版社總經理蘇惠良先生），「畀我5本《老貓》啦！」（哀求聲）一下又俾人攞晒。

出版社攞嚟畀我簽名，淨係衛斯理已經係我作品嘅一小部份，小部份嘅一半，81本攞嚟畀我簽，放滿晒我啲枱。啲人話「著作等身」，其實容乜易吖，我個人又唔高，哈哈！

【鹹濕小說封性學啟蒙】
半鹹濕嘅有，全鹹濕嘅冇喇。筆名都係倪匡。你哋太後生喇！我啲鹹濕小說係而家五、六十歲嗰啲人十五、六歲當係性學啟蒙㗎，個個都睇到嘩嘩聲。

我總共寫咗11本，俾法庭告咗6次。法庭告我太鹹濕囉。我一本收佢 1,000蚊稿費，俾法庭告一告罰咗6,000蚊。我唔好意思寫落去，佢話寫啦寫啦有人睇，哈哈！後尾我冇再寫落去。

我有啲鹹濕小說係大電影嘅鹹濕，而家嘅鹹濕小說係小電影嘅鹹濕。大電影嘅鹹濕比較好睇啲、多啲情節描寫，而家嗰啲完全係動作嚟嘅，色情動作片嚟。

【自揭三大蠢事之一】
重寫還珠樓主《蜀山劍俠傳》係我畢生三大蠢事之一（結集成書名為《紫青雙劍錄》），逐句加標點，廢話刪咗佢，俾我刪咗二分一以上。呢本書真係好睇，對我影響最大。（三大蠢事仲有邊兩件？）點可以講畀你聽㗎？咁冇面子。呢兩件蠢事唔講得，太冇面喇。

我改《紫青雙劍錄》，非但改，佢未完㗎嘛，寫咗幾百萬字都未完。我勉強幫佢續咗二、三十萬字，俾人鬧到狗血噴頭。所有鍾意《蜀山劍俠傳》嘅冇一個唔鬧我。

【與胞妹亦舒失聯22年】
佢寫到而家仲喺度寫，幾本事呀！其實佢寫嗰啲男男女女嘅故事，冇變化㗎！唔係一男兩女就係兩男一女、一男一女、ABC三個輪流鍾意唔鍾意，但真係可以寫落去，讀者又睇得落去，真係古怪！

iceefaery：『係真，我追佢哋兩兄妹小說追咗半生，買完一本等下一本，倪匡我睇到佢最後一本衛斯理，但亦舒…，我以為都會咁，但發現自己越嚟越快睇完一本書，又冇意慾再睇一次（所有書我最少會睇兩次，因為知道咗結局，同知道咗人物真正設定再睇會有另一種感受），我就冇再買佢嘅小說。

講開又講，佢d書嘅釘裝好唔 make sense，可能係為女性讀者啦，封面同內頁用紙都好靚，整到本書好重，咁都唔係大問題，最大問題係唔明點解釘得好實，攤唔開，對好鍾意睇住書食飯嘅我嚟講真係好唔方便，倪匡都冇點名講過。』

（同亦舒有冇聯絡？）佢50歲嗰年打過一個電話畀我，「『二哥呀（哭音），我都50歲喇！」 我話有乜嘢出奇？好快60歲。而家佢72歲，22年前通過個電話，從此冇聯絡。

嗰時想睇佢消息，可以睇《明報周刊》，佢有篇散文（專欄），而家散文都取消咗喇，音訊全無，冇聯絡。佢個女廿幾歲都冇見過。我打畀佢，都係去錄音機。（想唔想打畀佢？）我有乜嘢講啫？冇偈傾。佢有佢鍾意啲嘢我唔明，我鍾意啲嘢佢又唔明。

【帶牛肉等外星人】
我試過好多次喇，我以前住25樓，得閒無事就上天棚，坐喺度，等，至少睇吓有冇飛碟經過。嗰陣我住寶馬山賽西湖。等唔到外星人，你估我等到乜嘢？寶馬山原來好多麻鷹㗎，胡胡聲，仲以為我就嚟死落嚟啄我，嚇到我呢（拍拍心口定驚）……

我喺蒙古草原我都等飛碟㗎。我堅決相信（有外星人），因為星球太多喇。我哋想像嘅所有生命都係有頭有腳會郁嘅會呼吸會食嘢，你外星人嘅生命可以係唔同嘅形態，可以係唔郁，可能完全冇頭。

你上到火星，你話上頭冇生物，你點知你隔籬嗰嚿石頭係咪生物？佢喺隔籬睇住你你都唔知啦。你覺得佢怪，佢覺得你怪。
iceefaery：『衛斯理都去過一個冇人嘅星球，佢以為冇人，原來係所有人都冇晒身體，全部得番腦電波，可能火星人都係咁。』

所以我哋信教，信上帝就係外星人。有個女士話佢有個問題令佢好困擾，乜嘢問題？佢話佢信主耶穌，但係又信外星人。我話有乜嘢問題？根本乜嘢問題都冇，上帝就係外星人。

https://hk.entertainment.appledaily.com/enews/realtime/article/20190913/59984385


～*～*～*～*～*～*～

3 July，2022

佢今日下午走咗喇，應該係外星親人嚟接佢返去。

⋯其實冇乜嘢想講，

⋯佢嘅小說畀咗我好多娛樂，好多謝佢，

呢個時代，返外星可能都係一個好去處，

多謝，拜拜👋

水彩花卉風景 Jul 2019 - 9. 牡丹

我一向覺得玫瑰難畫，係因為未畫過牡丹。

老師示範…好似係先上一層底色，再用縫合法逐瓣勾勒，但我冇上底色，直接一瓣一瓣畫。
我知咁畫係會一格一格好拘謹，少咗水彩嘅輕靈感，但比較容易控制。

畫到呢度好似都幾好，有光影明暗…，有啩…，right？

畫埋其他先再番嚟強調暗位，老師以前講過，後加嘅色要用純色，如果唔係會好污糟。
我仲要提自己要用番紅色系，唔好畫到朵花瘀晒。

為咗唔走樣，我今次保留咗比上次更深色嘅鉛筆稿，終於，真係現晒形。

今次都係 cadmium red同 permanent rose兩溝嚟用，光位多 d cad red，暗位加少少紫，中間最暗加埋 alizarin crimson，效果幾好。
花瓣光位留白最重要，咁先表現到形態；
花瓣因位置唔同而明暗唔同，但我畫到忘咗形，心諗住呢片開始暗喇，就成片畫暗晒，所以顏色轉得好突然，同旁邊呼應唔到。（有圖片睇都畫成咁，真係……）
中間嗰朵唔知點解都係霉霉哋；
最高嗰朵顏色最乾淨；
後面嗰朵喺暗位，圖片、老師示範都係咁畫，但我咁畫就好似忽然跳咗 tone咁，係唔係因為附近嘅明暗度同顏色鋪排連接唔到佢嘅轉變？
定係我將佢畫前咗？（再睇番圖片，真係咁呀😞）
不過呢朵嘅立體感好好呀。

前面塊葉畫壞咗，仲要喺中間😞

背景我用咗紫藍色，老師示範用深色，比較容易突出 d花，但我都係鍾意淺色。
為咗突出番 d花，我加深咗色，都係因為咁加到朵大花怪怪咁，唉。

鉛筆線都幾明顯，但都係因為咁先畫到朵花似花樣，尤其是咁曲折嘅花瓣，冇線肯定唔見晒d前仰後合。

Cotman on Saunders Waterford 300g rough 11" x 15"

水彩花卉風景 Jul 2019 - 8. 遠山近草

😃遠山近草，乜嘢 description？

病咗冇去上堂，同學幫我影咗張相。
其實呢期好少喺堂上畫，好幾堂都係睇完示範就走，太攰啦，同埋真係冇乜 mood。 

今堂雖然冇睇示範，但都睇得出呢幅重點應該係層次，由遠山嘅灰紫到近草嘅青綠同黃，老師每次示範風景都有講到呢種由遠到近嘅用色原理。

不過，講就容易，真正調色未必做到，加上我成日反覆咁執，最前兩堆植物終於畀我畫到一樣咁滯，其實最前嗰堆光d架，有青綠同黃架😞

由鯉魚門舊石開始我就想畫得彩色d，所以我決定個天唔用藍色，其實個天會唔會真係黃色嘅呢？冇所為啦，我覺得最緊要同幅畫配合，不過，我畫得唔係好配合囉…，我已經喺水面加咗黃色，或者遠山都加少少可能好d。
山嘅紫好似太鮮明，加番d黃色睇吓。
海唔應該都用紫，應該冷番d，同埋唔似水囉…，
水面仲有零散嘅石，唔知算唔算畫到。

我諗最唔好嘅係，我以夢幻嘅黃色天空開頭，畫畫吓又寫實起上嚟，好唔統一，感覺奇怪。
老師話山脊唔好太平順，要加d曲折，
前面草地唔好全部咁高，遠嘅短d，近嘅長d。
（當然唔係評我幅畫講啦，我唔敢攞畀老師睇，驚嚇親佢。）

Cotman on Saunders Waterford 300g rough 11" x 15"

如果遲d有心情就救吓佢啦，如果唔係…，就算啦，都係一個嘗試。


~*~*~*~*~*~*~*


修咗喇。

海水加咗藍色，不過都係唔係幾似水，如果唔係中間留白反光，會似地多d；

遠山嘅紫色壓暗咗，加咗少少凹凸喺山脊，不過而家又覺得好似太實…；

因為唔想成幅畫太暖，天空加番藍色，仍然有少少魔幻感，有少少想用木顏色執吓佢…

我唔知人哋會點睇，但我覺得幾靚喎，等儲多少少勇氣 post上 instagram睇吓點…

Cotman on Saunders Waterford 300g rough 11" x 15"

~*~*~*~*~*~*~*

又再改咗個天，洗咗，再加番一層藍色，唔記得加番少少紅色，單調咗…
左邊個山係唔係應該深色d呢？不過唔再加喇，就咁啦。

Cotman on Saunders Waterford 300g rough 11" x 15"

水彩花卉風景 Jul 2019 - 5. 劍蘭

唉…，點解越畫越差呢？

Cotman on Saunders Waterford 300g rough 15" x 11"

背景顏色唔夠深同暗，同枝幹近似，已經加咗一次，加到好污糟。

我明白個問題喺邊，係因為先畫背景，而我對主體嘅outline冇信心，唔敢太深色同畫到太貼，驚冇位修正。

um.....我而家起稿已經認真咗好多，以前以為反正要上色，大概咁定咗位就得，都唔記得自己一上色就亂晒。但咁都好似幫助唔大，因為素描功力弱，鉛筆稿會比例唔啱，通常都要一邊上色一邊調整。

咁…畫主體先會唔會好d？根據過去經驗係會好d嘅。不過唔知點解老師好多時都會畫背景先，我哋就會跟住做，其實係唔係有分別呢？

老師話呢幅畫構圖簡單，焦點衹有一朵花，所以最重要表現花瓣嘅縐邊，其次係花芯。
縐邊嚟講，都還可以，
花芯就…叫做畫咗出嚟咁啦，
至於明暗，老師特別提我哋要強調增加趣味，光線由偏右上嚟，我算係失敗咗。
整體嚟睇，下面三片都ok，尤其滿意正下面嗰片，上面三片就…，每次畫花我都覺得正面對住嗰片花瓣最難畫，坦蕩蕩唔知點咁。

用色都有d困難，本來諗住用 permanent rose，但覺得冷咗d，所以加咗少少 cadmium red，後面兩個花蕾比例相反。

究竟邊種紅先係不冷不暖嘅正紅色呢？
我睇 pin illustration佢話佢三原色都係用冷暖兩種溝嚟用，所以搵到啱嘅紅色之前我都係溝住先啦。
前兩日買埋紫色同塑膠綠，呢兩種色好啱用嚟加深d色做背景。

~*~*~*~*~*~

睇到呢個 instagram，明白點解自己畫嘅畫係咁嘅水準，原來要咁嘅耐心同筆觸要咁穩定。

https://www.instagram.com/tv/B0-GF-6ISOE/?igshid=1ed5f8s50idou

水彩花卉風景 Jul 2019 - 7. 玫瑰

暫時嚟講，玫瑰係最難畫嘅花，難在起稿，層層疊疊咁，睇到眼花。
外圍花瓣我儘量畫，中間起稿都只不過係畫個旋渦，咦，咁講又好似好容易…
老師示範主要係用縫合法，我估係因為畫花唔適合重疊太多，會冇咗輕盈嬌嫩嘅感覺。
唉，我真係唔得啊…，明暗同色彩都做唔到一筆過，一定要重疊嚟 adjust。

還好朵花冇畫到瘀咗，可能因為我今次有紫色用，唔使用藍色啦，…忽然好有衝動想轉用 schmincke，因為見到有人話佢嘅水彩好清透，點溝都唔會 muddy，好啱我畫乜都要重疊。

跟老師嘅畫法，先輕輕上一層色，將光位嘅色『索』番起，再加深色做暗位，老師做完呢步就隱約有花嘅佈局，而我就得到唔均勻嘅顏色，不過唔緊要，最緊要有明暗，細畫嗰時就吓。

Cotman on Saunders Waterford 300g rough 11" x 15"

花芯冇稿，我用深色勾番出嚟，好似唔係好成功，不過都 ok啦。

外圍嘅花瓣衹要跟到稿都唔係太難，所以難都係難在起稿，『個稿起得好，唔會畫唔到』😆
跟住逐層重疊營造深度同角度就少不得，如果畫木顏色、素描或者 acrylic就冇煩惱點疊都得。

我幾鍾意 d花冧，葉就……
唔知點解背景變咗全體灰黑色，畫嘅時候明明係有偏紫有偏綠……，好彩主角粉紅色頂得住。

畫到角度好奇怪，似係高角度望落去，都幾得意。

水彩花卉風景 Jul 2019 - 4. 鬱金香

今堂我好認真咁起稿，而且留番都幾深色嘅鉛筆線，希望上色嘅時候唔好咁迷失。

我特登用番 shinhan，以為用 opera畫鬱金香會好適合，但後來又覺得佢太螢光，衹係用咗少少嚟調色，而其他色我以為好鮮明，點知老師話全部都好『瘀』，結果畫出嚟d花都霉霉哋。

所有藍色老師都話唔得，唉，我都知 shinhan d 色唔正，所以轉用 cotman，但唔知係到『瘀』嘅地步啫。會唔會因為擺耐咗？都四、五年喇，原來我已經學咗咁多年，…

係時候再檢討吓個 palette喇，加番塑膠綠同紫，仲有紅，天份有限，simple palette嘅概念都係收埋先。


呢張圖片我自己都畫過，重點係花嘅方向，同花瓣嘅形態，所以我唔理鉛筆線有冇影響，都要留低。原來上咗色就唔覺，ar......會唔會係因為我重疊到好厚所以遮到呢…？

Shinhan on Saunders Waterford 190g rough 15" x 11"

今次畫到好厚好硬，顏色又唔靚，好失敗，仲要唔記得咗花樽邊留白，花樽裡外又畫埋一樣色，結果要用木顏色同 gel pen畫番樽邊條線，再加深上截，都算救到咁啦。

枝葉畫唔到深度，尤其是深色部分，睇落好空虛。

alas……呢幅畫好失敗。

水彩花卉風景 Jul 2019 - 3. 鯉魚門燈塔

上一堂收到呢張圖片時，我就諗我要畫到舊石好多色彩，要用黃、橙、啡同紫，諗咗成個星期，到真係畫又擔心咁嘅色彩同個天唔配合，咁點嘅天先夾到呢？憑空想像終於都係諗唔到。

呢堂我冇好留意老師用乜嘢色，可能因為我自己已經有諗定嘅用色啦。

老師好細心咁解釋舊石嘅結構、顏色同光線或者海水嘅關係，要畫好一幅畫真係要考慮周詳。有一刻我諗：『唔需要知道d色點嚟，我睇到點跟住畫就得。』但諗諗吓就明白，如果係寫生就唔會有圖片，實物嘅光線同環境色唔會咁明顯，到時就會需要動用番臨摹得到嘅經驗同理論。好似有一次木顏色畫蘋果，同學問我點解可以畫到蘋果椗嘅背光位同cast shadow咁細緻，因為睇實物同相都唔明顯，咁就係因為我學過素描『知道』佢會係咁。我諗，初學素描畫石膏都係咁嘅原因。

畫嘅時候我放棄咗我個 colour scheme，用番比較『平實』嘅顏色，深色用 burnt umber、prussian blue，光嘅地方用 raw sienna 同 cerulean blue，始終想舊石 colourful d，有d地方加咗cadmium red同 alizarin crimson。今次我主要用縫合法，當然最後唔少得重疊修整啦，但都算運用到。上次畫對鞋都係成功咁用到縫合法，嗰次又係衹用 prussian blue同 burnt umber，可能因為色少，可以專心考慮點落筆啩。

舊石嘅明暗做得好好呀，好開心，不過前面嘅細石係唔係太淺色呢？

d欄杆本來係白色，老師就係咁徒手留白畫欄杆，但我唔用masking fluid冇信心畫到，所以將欄杆改成深色。

Cotman on Saunders Waterford 300g rough 15"x11"

個天有少少亂，因為我都唔知自己想點，cerulean blue加咗少少cobalt blue，本來想同d雲加少少層次，但畫完覺得個天都係平淡d好。

海水本來用咗 cerulean blue，😄😄咁咪同個天一樣？所以加咗紫色喺遠處，近景就加綠，都幾好，但唔知點解影相黃咗。

呢張用咗300g紙，會唔會因為咁所以畫得靚咗？

水彩花卉風景 Jul 2019 - 2. 百合

呢張圖之前畫過，但今次再畫並冇畫得好咗，不過老師就示範咗唔同嘅畫法。

今次佢先畫背景，用 negative painting嘅方法將朵花勾出。

好彩我今次好認真咁起稿，所以先上底色都大致可以勾到花嘅 outline，不過，因為唔想上色後見到鉛筆痕，我擦淡晒d線，所以畫到中間線條比較複雜都好迷惘，下次試吓留番鉛筆痕睇吓會點，有時我睇人d畫都見到鉛筆痕，都唔覺好突兀吖。

如果諗到要整濕張紙上背景色，我就用300g啦…

我邊上色邊局部掃水，唔想張紙縐起，效果唔知算唔算好，紙冇縐，但因為心急驚乾咗接唔上，畫到d outline唔係好流暢。

老師上完背景，話有d地方要『捽鬆』嚟表現距離，好似花瓣咁，近嗰條線要 sharp d，遠嗰邊就要朦朧d。我當時心諗應該上色嘅時候做埋，就唔使乾咗夾硬捽啦，但到自己畫就發現係兼顧唔到嘅，不過，乾咗又唔想再搞佢，出咗水跡唔知點補，所以我由得佢喇。

一如平時，老師示範個背景有唔同色調變化，而我就…

感覺呢幅畫個背景仲難過d花，雖然底色搞到outline好岩巉，但營造花瓣立體感我覺得我都ok，反正百合花瓣都好扭擰，睇落都自然，花蕊都好似畫得幾好咁，

Cotman on Saunders Waterford 190g rough 11" x 15"

畫埋幾塊葉後覺得背景太淺色，d葉同背景好似黐住咁，所以又再加一次背景色，終於都深色咗，不過我本來想局部有紫色，又驚contrast太大，調咗d綠色入去，結果都係變番綠色。😆anyway都算有變化咁啦。

加底色順便整少少第一層做唔到嘅『捽鬆』，…唔知成唔成功。

後面朵花又係黐住咗，有諗過用暗色嚟分開佢，但擔心用唔啱色會破壞成幅畫，緊記自己一向都『越補越壞』，都係就咁算喇。