畫畫 –企鵝（水彩）

安排失當，所有重點喺晒同一條線上😐

d樹係唔係應該再淡色 d？不過單睇佢哋我覺得畫得幾好。

兩隻企鵝本來係好開心，畀我畫到似慌忙逃走多 d，我總係畫唔好表情。

仲有影同燈都⋯😌

Schmincke Akademie on Saunders Waterford 190g rough 7.5"x5.5"

畫畫 – 蒲公英 Taraxacum（水彩）

蒲公英葉生得好奇怪，畫嚟畫去都係唔似樣，或者我應該搵張圖照畫。

朵花唔應該用深啡色，畫到成朵黑晒。應該用橙色？橙黃加對比色？我好似已經忘記咗對比色呢回事😅

Schmincke Akademie on Saunders Waterford 190g rough 7.5"x5.5"

呢張終於都似我想要嘅樣，淡、薄得嚟有色彩，尤其係個天，因為冇多手糊嚟糊去。

四邊冇變成直線，散開得都幾自然。

蒲公英係用布索番嚟留白，冇畫黃花，次次都畫唔好。

Schmincke Akademie on Saunders Waterford 190g rough 7.5"x5.5"

畫畫 – 仙人掌（水彩）

 

兩張嘅球形都畫得有 d驚嚇，第一張顏色更係格格不入，諗住突出哋，但厚實咗。

第二張就總係更差。

Schmincke Akademie on Saunders Waterford 190g rough 7.5"x5.5"

畫畫 – 蟲仔（水彩）

開始培養返畫畫嘅習慣😄，冇乜 quality都畫吓啦。

Schmincke Akademie on Saunders Waterford 190g rough

諗住畫隻蟻，都似嘅😁，第三節係唔係畫長咗？不過長腿都幾靚吖。

佢飲緊塊葉滴落嚟嘅水珠，粒水珠⋯😅

畫畫 – 雀仔（水彩）

呢隻雀仔有名㗎，叫『銀喉長尾山雀』，又叫雪精靈，成個雪球咁好可愛。不過 title唔出呢個名喇，費事下次求其畫隻自創嘅雀仔又畀唔到名佢啦。😁

畫佢除咗因為可愛，仲因為佢成個波咁，容易畫。

不過都係畫肥咗，尾又畫短咗，但都算畫到佢嘅毛茸茸。

背景嘅雪落得太兇猛，可能天氣潮濕，d鹽黐埋咗🤷

畫畫 – 屋仔、菇仔（水彩）

除咗上個月上咗一堂，都成大半年冇畫過水彩，呢兩日又畫返吓 d低技巧嘅畫。

雖然加咗兩隻 blue bird，都係冇咩趣味同生氣，well⋯我得承認我真係冇乜畫畫天份，純粹係鍾意畫畫，然而都因為懶好少畫，究竟咩叫鍾意呢😂

Schmincke Akademie on Saunders Waterford 190 rough 7.5"x5.5"

Schmincke Akademie on Saunders Waterford 190 rough 7.5"x5.5"

阿 sir話加幾隻飛鳥畫面會有 d生氣，但我畫到污糟咗咁，真係好生氣😤

d山加 d綠色畫面可能會比較平衡。

菇上面嘅白點冇留白，畫完用 koh-i-nor嘅 white charcoal加嘅，效果比我想像中好，白得幾明顯。

Schmincke Akademie on Saunders Waterford 190 rough 7.5"x5.5"

畀枝 masking fluid激死，畫完發現捽唔甩😠😠😠，本來呢枝 masking fluid筆狀，好方便，筆頭夠細仲好啱細位留白，但都冇用啦⋯

樽裝嘅 masking fluid用起嚟好麻煩，擺一陣又成樽乾晒，都係學吓自己留白算啦。

btw，呢張係 Arches紙，忽然覺得佢顏色擴散得真係幾好，texture夠 rough，筆觸會多 d質感，或者可以考慮多 d用呢種紙。

水彩班 10 Oct 2022 – 仙人掌

呢一晚終於夾到時間上堂，距離上一次水彩堂已經九個月，喺 group見到同學進步咗好多，而我⋯，原來我只係上咗阿 sir三堂水彩班咋😓，素描反而仲多，hmph⋯

題材係仙人掌，唔係平時嘅寫實風格，今堂主要玩混色。

咩都唔想講，畫得超差勁，朵朵都畫到差唔多色。😔

阿 sir話我應該善用 pure cotton紙嘅特性，任由顏色自己喺紙上擴散同混合，但我就一直用筆喺紙上糊嚟糊去（佢冇講呢句，但自己明啦😓）。

畫畫吓阿 sir又行過我個位，睇咗我一陣，當時我畫緊其中一個細嘅個口嗰 d小刺，嗰刻我先忽然醒覺：『我又畫得太細喇！』阿 sir冇講嘢就行咗去睇其他同學，佢應該係覺得再話我都嘥氣。

呢種不顧大局，專執著小眉小眼嘅性格真係要改善。

上完呢堂，又唔知幾時先再上到堂😞

 

Oh my God !

呢幾年，世畀搞到咁，好多人話審判日要嚟喇。
（就算我信有上帝，都唔覺得而家就係呢個日子，如果 WWII 都冇嚟，而家算得乜？the worst is yet to come，我係唔係太悲觀？）

究竟上帝係邊個？

假設你好似 d慈善團體咁去落後地方探訪，覺得佢哋真係好慘，留低幫手教吓小朋友識字，幫手修整房屋、起儲水池，然後你返屋企，臨走時小朋友都好唔捨得你，於是你話：『如果你哋乖，我遲吓就會返嚟探你哋，仲可以帶你哋去主題公園玩。』於是一代傳一代，漸漸成為一個傳說：如果小朋友乖，終有一日有人會嚟帶我哋去主題公園㗎！

但返到屋企，就會有自己嘅人生要過，最多 keep住捐錢，仲會山長水遠再去睇佢哋？
或者，想再去，但係冇經費，
或者去咗幫其他更需要幫助嘅地方，
總之，你都唔會再去。

假如接受上帝係外星人嘅話，大家喺宇宙中只不過係鄰居關係，邊個對邊個有無限嘅責任？路見不平幫你整頓吓，臨走講幾句勉勵說話，幾千年嚟人類就當真。

都好嘅，咁人類就有咗信仰、盼望、目標、指引，呢 d嘢好虛無，但原來好重要，影響到人成為一個點嘅人，組成一個點嘅社會，but anyway⋯我都係唔會信教😂，雖然又不能否定自細接受咗十幾年天主教薰陶，背十戒對我嘅影響。

有時我又會覺得，呢個世界係『上帝』嘅玩具或者功課，好似有一種『益智玩具』係用一個透明箱養螞蟻，觀察佢哋嘅生態，玩厭咗或者交咗功課，就由得佢自生自滅囉，反正係一個 ecosphere，supposed to be self sustainable，點諗到裡面 d人會玩到生態同心態都失咗平衡呢？

唉⋯

世代更替

前兩日，Federer 喺 laver cup打咗佢嘅告別賽。

laver cup係表演性質，我相信以後佢都一定會再參加類似活動，所以我覺得佢職業生涯最後一場比賽⋯應該係 2021 Wimbledon⋯？

不過告別賽咁大件事，佢梗係留返畀自己公司啦。

佢嘅告別賽係一場輸咗嘅比賽， 係同 rafa嘅雙打，輸咗，似乎更表達到世代嘅交接。

到 rafa告別嘅時候，邊個陪佢呢？雖然佢同 Djokovic有更多對戰，但同 Federer嘅比賽更震撼人心，或者係因為大家比較鍾意 Federer啦，又或者，作為 rafafans，我更喜歡 rafa挑戰強者（仲要成功）嘅戲份啦。

再前兩星期，英女皇走咗，真係有 d傷感，唔係對佢有乜感情，但佢係一個自我出世就已經存在嘅 icon，好似一個永恆嘅存在咁，然而都係會消失。

好多人認為喺呢個時代，皇室唔應該再存在，但我覺得，而家表面上存在嘅皇室已經變咗一個國家嘅公關，全部都冇實權，似明星或者代言人多 d，反而真正做到皇帝咁嘅，又唔係以皇帝嘅名號出現。

王子公主係活生生嘅童話咁，著到靚靚咁出嚟，守住一 d好束縛嘅規矩，根本係一場表演，真人 show咁，如果本人唔係好有表演慾，應該幾難受，一生人嘅一舉一動都成為新聞，又唔係真係行使到皇權，係食好住好著得靚囉⋯

每次見到 kate著住長裙、四吋高踭鞋，單手抱住個小朋友行落飛機嘅梯級，我就覺得：皇妃真係好難做，有時另一隻手仲要拖住另一個，仲要抬頭向前面笑，畀我一定會成串咁跌落樓梯😂，不過我又唔會覺得佢好慘，皇妃唔同王子公主，做唔做皇妃係佢自己嘅選擇。

咦，講咗去邊⋯？

無論喺邊個層面，都不斷有更替，皇室嘅更替週期會長 d，運動員會短 d，大時代嘅更替⋯我希望好快會發生。

素描班 2 Sept 2022 – 鉗

一路睇示範一路諗：『實畫唔到』、『點畫到⋯』、『不如睇完示範就走』。

嚟得到，點可以唔畫呢⋯？但真係冇信心畫到啱角度，諗起 Instagram經常 push畀我嘅一個素描 account，佢畫乜都係首先變成直線，畫香蕉都係一舊起晒角咁，於是我嘗試將個鉗變成一個盒，會比較容易處理到佢個『姿勢』😂，只要個盒嘅角度啱，再跟住個盒去畫返個手柄，咁就唔會畫到離晒譜啦。

平時我會上咗底色先畀阿 sir睇，😏哪來的信心？今次我畫完個框就畀阿 sir睇咗先，要改都早早改到。結果我都係畫細咗個柄嘅位，但角度畫啱咗呀！塊布都係改咗幾筆咋！👏

上色算係比較容易嘅步驟，雖然我仍然掌握唔好各區明暗對比，但都係我可以信心滿滿咁落筆嘅環節（哪來的信心？）， 呢堂繼續用 2B同 2H，最後先用 4B加深色。

我今堂好克制，一直提醒自己『大局為重』😂，唔使畫太多細節表示自己觀察入微，但畀阿 sir睇，我仍然係畫多咗一撻無謂嘅反光，應強調嘅又冇強調😅。

anyway，由最初諗住畫唔到，到終於畫得都算似樣，上堂有人指導好重要，但自己成日唔肯畫 d難少少嘅嘢，係唔係因為懶？定係因為上堂有群眾壓力先畀 d心機好好哋畫？😂

btw，同學真係好勤力，帶咗幅人像素描嘅稿返去畀阿 sir睇，畫得好認真好靚，我會唔會都可以呢？以前上 miss ho堂都畫過，但冇乜推動力無端端自己畫囉⋯

其實呢個素描班嘅每一幅都係未完成嘅，只係唔想喺屋企畫素描，因為好污糟，究竟有邊度可以畀我畫吓素描呢，唔通要租個時租辦公位？😂

素描班 19 Aug 2022 – 番茄、冬菇

今堂畫番茄同冬菇，係容易畫嘅嘢，不過我起稿時都係將後面兩個番茄畫大咗。

呢堂最重要嘅 information就係：『唔好睇得太細』，其實阿 sir講咗好多次，我都唔係好明，今次忽然 get到。全因我平時懶係觀察入微咁，掛住畫 d微不足道嘅細節反而忽略咗成個大局嘅佈置，所以我諗，即係應該先注意整體嘅光線明暗，而唔係個體嘅細節，其實呢，又一向都知道嘅，只係畫嘅時候乜都唔記得咗。（正如一切做人道理我都知道，但親歷其境時我嘅 knowledge同 logic會唔見咗， instinct同 emotion會走出嚟主持大局。）

呢兩堂都儘量只用 HB、2H、3B同 4B，但唔知係唔係我唔夠力，同一枝筆，阿 sir畫到好深色，而我畫就好淺色，hmmph⋯而且今堂最難嘅係顏色，佢哋顏色雖然唔同，但 value好接近，畫黑白分唔到，我畫畫吓有 d混亂，唔知應該邊度深邊度淺，最後係成幅都淺色😒

 

素描班 5 Aug 2022 - 咖啡壺

素描班唔係個個星期都有，好多時都唔夠人開唔成，阿 sir target六人，但次次都得五個 enroll，不過好彩阿 sir好多時都會照上堂。

我仍然係盡力模仿阿 sir嘅方法去定位，ummm⋯似乎有少少效果，今堂阿 sir只幫我改咗少少，嘩，好開心！

不過，上色就一團糟，最主要都係深唔到色啦，我都知道金屬一定要有極深色先托得出反光位，我⋯有少少迷失，以前畫深色我總係用 6B甚至 8B，但自從上堂阿 sir講咗盡量用 2H、3H，我用 B筆上完底色就轉用 H同 HB，但畫極都唔夠深色，係唔係真係我太細力呢？阿 sir示範用 4B都好深色㗎⋯

阿 sir有再強調，要用 2H3H畫先會見到筆觸，見到筆觸先有質感。

蓋同手柄都幾 ok，壺身同壺咀就⋯，壺咀怪怪咁。

加過色，但仍然未夠黑，係唔係應該用番 6B打咗底先呢？

畫唔出反光效果，成個中藥瓦煲咁😂

上次畫得好好嗰位同學帶咗幅畫番嚟，佢 enhance咗明暗，真係畫得好好，但今堂佢就用咗成堂都仲未畫好個 outline，原來有好似我咁畫唔好直線嘅人，亦有好似佢咁畫唔好曲線嘅，各有各嘅問題。

呢堂 suppose係上到 9:30 ，我通常夠鐘就走，未畫完都唔會留低，但其他同學好多時都係繼續畫，阿 sir亦會繼續幫佢哋修改講解，感覺係短時間內唔會結束咁。我係唔係都應該留低繼續？我自己就覺得過咗鐘會唔好意思囉⋯，都已經咁夜，阿 sir好似住好遠，佢都要休息係咪？（有一次我好早去到，佢伏喺度瞓緊，畀我嘈醒咗，以後我都夠鐘先上去）。如果阿 sir唔係一個計較嘅人，會唔會反而覺得我好唔投入、對畫畫冇熱情、冇盡力做好呢？做人真係好難😂

素描班 15 Jul 2022 – 多面立體石膏

今堂好災難呀！

上堂阿 sir一再強調呢 d對形態冇要求嘅唔可以成日畫，耐唔耐畫吓調劑吓就好，要畫呢種多面體先學到嘢。

似乎係素描基本嘅方法，拉條線，兩個相交點就係正確位置，呢點我明，但係點決定呢兩條線嘅角度？只要一條角度唔啱，個相交點就唔會啱，hmmph⋯

就算係阿 sir每次都要先做嘅：劃出整件事物嘅範圍，我都做唔到，都係嗰句：我能夠就咁畫得出佢整體範圍同形狀，我就直接畫到件物件啦⋯

但係，我都嘗試照做，深信總有一次會明白其中道理。

（呢幅都係落咗堂冇繼續畫，所以只有大致明暗）

畫完個唔知準唔準確嘅範圍，畫中間個十字，但只係簡單兩條線，都畫咗好耐，究竟相交嘅角度係點？呢個位好決定性，阿 sir教要直立張畫紙（所以用畫架畫畫會好 d），直接同實物拼埋睇。

喺差唔多擦爛張紙之前，我終於畫到兩條角度 ok嘅線，跟住發展其他部分，當然都係擦唔停啦。有時我會諗番起 geometry嗰 d adjacent angle，angles in alt seg，但畫畫係唔適用嘅，因為畫係用錯覺造成嘅假象，畫得真實反而唔似，尤其係呢種立體，每個角都要用眼判斷佢嘅角度，唉，我嘅眼力⋯，有時連條線係向上定向下都要攞枝筆拍埋去先分到。

呢幅圖真係牽一髮動全身，改一條線就要成幅圖改一次，當我改咗十萬次，覺得雖不中亦不遠矣，畀阿 sir睇，佢將我個圖改晒咁滯，改改吓連中間個十字都改埋，唯一冇改嘅只有十字嘅相交點，⋯⋯⋯⋯⋯⋯⋯⋯⋯⋯⋯

⋯⋯⋯⋯⋯⋯⋯⋯⋯⋯⋯

冇嘢好講，太差喇，對自己好失望。

我應該影張相先，可以同阿 sir嘅改動比較吓，或者可以睇出我嘅問題。點解唔直接問？因為我驚佢講極我都唔明囉。

有一位同學，我見佢幾堂畫得都⋯唔算 ok㗎，但今堂呢個佢畫得好工整，阿 sir都冇乜要改，同學話全部直線反而容易畫，可能佢眼中睇一切都結構分明，頭腦又清晰啦。

😖素描先真係最難㗎⋯

素描班 8 July 2022 – 水蜜桃

今堂畫水蜜桃，本來幾怕畫圓形嘅嘢，但相比起前兩堂嘅幾何體，原來圓形嘅水果都算容易。

我跟阿 sir教咁，先用線條劃出整堆要畫嘅物件，包括個影嘅範圍，再喺裡面分出各個小個體。

我嘗試用三角形定位，即係 ABC三點之間嘅距離，邊個近邊個多 d咁，左度右度畫畫吓都有 d混亂，但混亂之中都畫到，阿 sir睇過都冇之前咁要大手筆改動，不過都話今次畫嘅係比之前容易。

呢個方法畫幾何體啱唔啱用呢⋯？

畫完 outline就要畫暗位，有 d位要主體同個影一齊做，而唔係各自做，好似右邊個桃同個 cast shadow就係一堆咁做，加完所有暗位，下一步先至各自描畫。

睇阿 sir畫嗰時覺得每筆都係理所當然，我返埋位照畫就得，但每次到自己畫嘅時候個腦就空白咗，只係得番個結果，過程冇晒。

阿 sir提咗一樣我成日都諗唔明嘅嘢，就係物件淺色嘅位喺暗位，深色喺光位，佢話喺呢個時候，體積比固有色重要，所以我哋都係推暗個暗位，唔好理佢固有色嘅深淺，所以我幅畫都睇唔出水蜜桃嘅深淺色，不過，是否只係素描係咁？如果係水彩又點表現顏色？

阿 sir話一幅素描裡面，畫出光線變化好重要，尤其是由『暗背景光主體』到『光背景暗主體』嘅變化要清楚表現出嚟。

畫每一個色塊時，要同相鄰色塊比較，咁整體嘅光暗先會啱比例。

我以為要深色用 8B就 ok，但阿 sir話『2B畫到唔好用3B，3B畫到唔好用 4B』，因為 8B筆芯軟，捽開會鬆，幅畫會冇晒線條。我多數都用 6B，再用 8B加強，唔怪之得我成日都畫到毛公仔咁啦。

唉，所以呢，原來素描真係畫畫嘅基礎嚟，仲記得第一次去上 miss ho嘅水彩班，佢問我哋有冇學過素描，差不多全班都冇，佢話：『你哋真係沙膽，唔識素描就走嚟學水彩』，我諗佢睇到我哋連個圓形都畫唔好真係心裡崩潰，然後唔知笑咗幾多次，笑到笑唔出😂。

究竟我畫得似唔似水蜜桃？定似蘋果？其實未算畫完嘅，不過返屋企見唔到實物，唔想跟相畫，而且素描好污糟，唔想喺屋企畫。

Rafa's withdrawal from Wimbledon 2022

Rafa今年好多傷患，但又好神奇贏咗 ao同 fo，大家都等住睇佢贏唔贏得埋 Wimbledon嘅時候，佢退出咗 semi final，因為腹部肌肉撕裂咗，早幾年有球員都係咁，運動去到呢個 level已經唔係健康嘅事情，反而變咗消耗健康。

佢嘅退出引嚟好多評論，有人話佢扮傷，因為知道打唔贏 Kyrgios，are you kidding？首先，rafa唔會因為驚輸退出囉，佢都輸唔少次啦，第二，雖然 Kyrgios最近好似忽然發奮，但 rafa都唔一定輸。

佢喺4th round對 fritz嘅時候痛起上嚟，call過 medical timeout，最後撐住打到第五局終於 tie break贏咗，於是好多人批評佢『自私』，認為佢應該當場退出，畀 fritz出線打 semi final，😂it's wholly ridiculous，一個球員堅持打完場波唔係叫體育精神咩？退出為咗畀對手可以出線唔係叫『打假波』咩？

其實我都好不爽 Kyrgios可以咁順利就行咗入 final，但唔可以咁去計算，而且一場比賽嘅勝負除咗影響排名，仲影響收入，點解 rafa要無端端成全人哋呢？

今年 Wimbledon除咗呢個退出風波，3rd round比賽中途叫咗對手去網前，話對手打完個波先嗌影響到佢，都係幾奇怪，因為規矩係雙方唔可以喺比賽中對話，rafa打咗咁多年波點會唔知？

我估佢對呢次比賽真係非常著緊，到咗不容有失嘅地步，可能係諗住咁難得贏到 ao，試吓衝番次 calenda slam，又可能係自知隨時都有可能退休，今年可能係最後機會攞多次 Wimbledon啦。唉，所以打到去 semi final要退出真係好 frustrated。

佢曾經講過，退休後先會結婚，因為希望可以時時陪住小朋友，唔想掉低佢哋出去比賽，但佢早兩年都結咗婚，今年，仲宣佈就快做爸爸，加上佢身體各種傷患愈發嚴重，相信真係係時候退休喇，但我估佢又唔會想早過 Federer，都唔係 gs數嘅問題，而係咁會畀人落實佢打法令佢唔打得耐，雖然佢都已經比預期打耐咗，但睇吓 Federer同 Djokovic，人哋都仲打緊喎，而家退休又會畀人講。其實，好似得 Federer唔會畀人講咁，Djokovic畀人講得仲多，btw最近睇咗 d clips，佢 d behaviour又真係幾差，唔怪得咁多人唔鍾意佢嘅。

至於 Wimbledon，Djokovic vs Kyrgios，邊個贏都係咁啦，唔想 Djokovic追近 rafa，又唔忿 Kyrgios攞到 gs，有人話希望 nobody wins，有人同我一樣嘅諗法：Wimbledon is ended when rafa is gone，😂

希望佢今年打到 us open啦，如果唔係又畀 Djokovic攞埋。

～*～*～*～*～*～

真係估唔到佢細個鍾意室內同草地多 d，有人話 Federer都講過唔明點解自己 clay打得冇咁好，因為佢自細都係打 clay court。

都話佢哋似㗎啦，可能喺某個時間點互換咗。

素描班 17 June 2022 – 石膏、碗

素描彷彿仲難過水彩，尤其是畫幾何體，線條要直、角度要啱，比較起嚟，水彩風景簡直係冇要求，就算畫花嘅容忍度都好高。

呢舊石膏⋯，冇實物對照都幾 ok，但其實畫唔啱比例，我仍然對阿 sir所講嘅拉線好迷糊。

畫咗成堂都畫唔掂，返到屋企都冇心機再執。

素描班 10 Jun 2022 – 楊桃、石膏

好不容易，素描班開第二堂，可能素描冇水彩咁受歡迎啦，唔係堂堂開得成。

呢堂畫一舊石膏，同一個楊桃，好特別嘅組合😄，不過有質地同顏色嘅差異，又不過我都畫唔出嚟。

呢個幾何石膏 object好難畫，老師教呢邊拉一條線、嗰邊拉一條線，相交點就係某個點嘅定位，…相交點我明，但嗰條線…我都要拉得啱方向同長度， 個相交點先會啱，如果我有能力決定呢兩條線嘅正確方向同長度，我直接畫要由相交點開始嗰條線唔係仲好咩？其實我都見過人哋咁畫，我覺得好有型㗎，希望我以後會學識啦。

今次畫呢個石膏全部都係直線，我畫唔到直線嘅缺陷表露無遺，記得細個某一次忽然畫咗條弧度好靚嘅曲線，自始畫親線隻手會自動彎一彎，就算開頭直，到尾都要勾一吓😂，要好好練習吓畫直線先得喇。

我畫畫嘅習慣係修改，由最初差好遠逐漸改到似，應該就係因為我唔識老師教嗰種拉線方法啦，要畫咗個雛形先睇到差幾遠，經常擦到紙都爛，同返工時寫 email一樣，唔理措詞文法，寫咗先，改吓改吓就成型。不過寫 email冇人知我改咗幾多次，但眾目睽睽擦完又擦就好難睇，同學唔會得閒睇我，但老師會睇到原來我學唔到嘢。😖

不過呢幅畫個石膏最後都算畫到，比例都算啱，個楊桃都 ok㗎，不過成幅畫睇落好悶，同上次嗰幅比爭好遠，應該係因為 value幅度細，同我嘅水彩畫咁悶同一原因，水彩畫有顏色難分 value（我色感都幾差），黑白素描就要盡量畫得分明 d啦，堂上都唔覺咁悶，影咗相先發覺。

我試吓再加 d色救吓佢。

素描班 20 May 2022– 杯

終於同老師嘅素描班夾到時間。

雖然以前都跟 miss ho學過兩期素描，但 miss ho教班係唔會由最基本教，我一向都覺得佢比較奔放，對形狀、位置唔著重，所以我以為只要畫到就得，好似呢幾隻杯，我以為畫到基本形狀、明暗、擺位，一切差不多就 ok。

一開始畫就發現我同同學們好唔同，佢哋一邊畫一邊好 artistic咁伸出手，用枝筆嚟度位，而我就憑感覺 😅。我都知道呢個動作係量度物件嘅比例，仲有拉線定位嗰 d，都係老師示範嘅時候睇到，佢冇特別講，但我相信佢之前係有講解嘅，因為聽到同學話：畀番晒阿 sir喇。

原來，物件之間嘅距離、光線、明暗對比都要注意，我諗學基本技巧時係要認真 d嘅，而家應該係學捕捉描畫對象嘅形態，熟習咗先再到其他咁啦。

有幾樣嘢要注意嘅：

物件形狀、比例

物件之間嘅距離

明暗 – 呢個比較難，即係畫咗一隻杯，佢唔係單獨存在，要睇番佢嘅光位暗位同其他物件是否合比例。

焦點、清晰度 – 唔係睇到乜都要畫出嚟，要決定畫嘅焦點，焦點要清晰，要畫出細節，焦點以外唔需要太多細節，明暗亦唔需要太大對比，好似呢幅，焦點係下面嗰隻杯。

老師幫我執咗一 d光暗，我將全部都畫得光咗，同水彩一樣，唔敢用深色。希望下一堂可以畫得似樣 d啦。

紅樓夢 28．「人物」詮釋分析的原則 – 臺大開放式課程（歐麗娟教授）

教授在每一課中都強調，不要帶著成見看人物角色，尤其不要以為寶釵虛偽、王夫人不關心愛護園中的少女們、李紈年紀很大等等，要仔細閱讀文本中的描述來分析判斷。

其實我不知道其他人有沒有這種成見，我從沒有上面那些看法，因為我沒看得出那麼多呢，除了李紈的年紀，雖說她也才二十歲多，可是在一眾十二、三歲，甚至不夠十歲的人之中，她的年紀也真是大了。

不知道紅樓夢人物的年紀是真實，還是藝術性地誇張了，都才十二、三歲，便那麼懂得人情世故，又懂做詩，真令人汗顏。也許是教育所致，賈府這種家庭，孩子被培養成為家族繼承人，女孩子就算出嫁也是門當戶對的大家族，所以自小便得了解各種人情世故吧。

*～*～*～*～

無論對於小說人物、或是現實中認識的人，首先就是不要被主觀想法影響、不要對人物有預設立場、亦不要輕率地下標籤，這樣我們才能夠真正地了解對方。

可是，現實中我們不會知道身邊人物的所有資訊，所以人與人之間的確是難於理解，但小說卻不同，作者會為讀者提供足以理解角色的資訊，所以讀者能夠在小說中得到對人性的好奇與探索的體驗。（所以我漸漸發現，自己那麼喜歡看小說，跟文化沒有關係，直接點說，就是「八卦」，身邊人誰會巨細靡遺跟你分享一切？他為甚麼會做這件事？為甚麼有這個想法？你只知道結果，不會知道過程，可是小說卻讓讀者以上帝視角看清看楚。）

5:20 無論是現實中，還是小說中，每個人物都是一個『個人』，法國哲學家 Louis Dumont（還是人類學家？或兩者皆是？）在著作【階序人】所說的『個人』Individualism，有兩種意義：

一是特定的、經驗上的，他的生命史，出身、成長、面對的家庭、教育、社會對他所形成的影響，以致他成為現在的『個人』。

第二種是把『個人』看成是『價值擁有者』，他的存在就是體現某種價值。

讀者很容易會用第二種看法來看書中人物，在紅樓夢而言，讀者會把寶釵看作封建、把黛玉看成反抗禮教，這是因為讀者沒有以作者在書中提供的資訊深入去了解人物的生活空間、人際關係，原因可能是讀者本身的人性、文化傳統和時代的不同。

這種『臉譜式閱讀』，很通常地在作者與讀者之間形成的一種默契，讀者只關心情節發展，沒有耐性閱讀人物的內心和性格、與其他人物和環境的互動，而作者為了讓讀者容易理解角色和情節，會把情節需要的角色個性刻意展現，就像中國戲劇中的臉譜，生旦淨末丑，是一個『角色』，各有所司，而不是一個『人物』，讀者不需要花時間去理解他的心理變化也能很快理解。

套用到英國小說家 E.M. Forster的人物論，（20:30）第一種是『圓形人物』，這能展現一位小說家的寫作功力、對人性的理解有多深，利用背景刻畫、人物互動，以令人信服的方式讓人物活在小說的字裡行間，更能不為書本所限制地活在書本沒描述的部分，也只有『圓形人物』能作悲劇性的表現（雖然有同感，但希望能從教授的課中得到論點，如何有理據地表達出來）；而第二種則是『扁平人物』，他的存在是為了烘托圓形人物和劇情的推進。一部缺乏圓形人物的小說，會流於片面，故事變得一目了然，三言兩語就說完，沒有可讀性，也不會令讀者回味；然而，圓形人物也不是愈多愈好，小說畢竟是一種『人為的藝術』，太多的話會令小說結構混亂，也需要扁平人物作為參照以突顯圓形人物。

（所以讀者跟作者需要匹配，不同作者有他自己的目標讀者群，讀者也尋找適合自己需要的讀物。小時候喜歡亦舒的小說，可是漸漸感覺她的小說不經看，一本小說大半小時看完，現在看來，是因為其中人物都偏向屬於扁平人物，一出場就知道他的身份、他大概會怎樣反應，看的時候行雲流水，一下子就去到結局了，然後也沒有帶來甚麼思潮迴盪）

這種人物的刻劃方法也並不是現代才開始，如明代董復亨：『太史公列傳每於人紕漏處刻畫不肯休，蓋紕漏處，即本人的真精神，所以別於諸人也。』就是從不同角度刻畫人物，不單描述好處也描述壞處，讓讀者對人物有更深入了解。（也就是我們現在說的把人物描寫得更人性化，令讀者更能投入人物角色的情緒？）（這也是近日男團那麼受追捧的原因，他們是從一個 reality show選拔出來，十多集的節目，觀眾看著他們練習、改進、開心、失望，一路下來，各人因應自己的歷程都有各自的追捧者，已不只是圓形人物，簡直是『球形人物』了）

一個角色在一個情節、一個情境所展現的反應和個性，只是他人格的一部分，所以讀者不要把人物的『人格特質』看成『人格價值』，這樣會把圓形人物看成扁平人物。

35:00 曹雪芹在紅樓夢中對人物有很深的刻劃，令讀者對人物性格的養成和變化「知其然」，亦「知其所以然」，讀者不單看到人物的特質，也能看到這特質如何形成。

40:00 教授引述美國 biochemist W.P. Jencks的研究說，人格發展有先天因素，也有後天因素，遺傳佔45%，環境35%，其餘20%是前兩者的相互作用。就如小說第二回就有說到，雨村聽了，笑道：「可知我前言不謬。你我方纔所說的這幾個人，都只怕是那正邪兩賦而來一路之人，未可知也。」這正邪兩賦說的就是遺傳那45%。

（如果說人的特質超過一半都來自遺傳，那麼讀者在字裡行間能看到的特質養成也沒多少，反正就是知道來自世家大族的人，自有他們的一套。）

（總而言之，就是：要細看小說裡各種描述，就算是過場，跟故事情節無關，也跟人物性格有關吧。）

出咗自己嘅雜誌啊！Imaginzine 五月號！

好耐冇買實體雜誌，不過出咗自己嘅雜誌😁（封面😂）

內容都係嗰個月發生嘅事，但未過晒又點知有乜發生呢？所以雜誌唔 update，主要都係探討😄
（煞有介事😂）

用 procreate造圖，goodnotes打字。

畫畫 – 花（procreate）

呢幅盡量唔畫到咁仔細，但結果都係畫咗兩日😅

今次想試吓畫得似水彩，主要用咗 wet glaze，不過好難控制，出嚟嘅效果就只係睇唔到筆觸，不過都似我畫嘅水彩嘅，都係幾生硬😄

background用 organic - spires。

中間係後來 erase番出嚟，因為畫葉嗰陣冇打層實色嘅底，呢層 background透咗上去，d葉暗晒，所以中間留低正好做暗位。

本來多幾個 value，有深度少少，不過 erase錯咗重新做過，我一重覆做嘅嘢就搞成咁😵

用 water - wet glaze，冇理明暗，用 selection -freehand逐塊葉畫，畫得好隨意、好快。

花都係用 water - wet glaze，逐朵畫，明暗位要仔細，所以畫咗好耐。

要填細位時用 sketching - narinder pencil，呢個 brush好好用。（本來想 elaborate吓點好用，但諗唔到點形容，so⋯😂）

畫畫 – 花（procreate）

第一幅用 procreate認真畫嘅畫。

我諗我唔可以太多用 procreate嚟畫畫，因為佢可以放到好大，我畫到有 d走火入魔，逐粒 pixel畫咁滯，畫面明明冇乜嘢，但斷斷續續畫咗幾日，畫到枝 Apple pencil都『掘掘哋』，真係想刨吓佢😂，係真㗎，我用 paperlike mon貼，有 youtuber話佢枝筆磨損到見到裡面嘅金屬，不過佢又太誇張囉。（May 2022：我唔敢再話佢誇張喇，因為我用咗兩、三個月，枝筆都磨到見金屬😖）

insert張相入去做 reference，仲可以攞張相嘅顏色嚟用，呢個 step令我發現我睇顏色真係好有問題，我明明睇到係綠色，攞咗隻色原來係啡黃，所以我成日畫到 d畫顏色好詭異囉。（會唔會我平時以為好嫩綠嘅菜，其實已經黃晒呢？）

認真畫嘅部分真係好真實呀⋯，成張相咁😆，不過我原意唔係想咁㗎。

今次有好好運用 layers，用咗五層，

第一層係 background，用 soft brush加 soft blend，三幾吓完成，如果係水彩就要好小心咁畫。

幾朵花嘅位係後來 erase番，因為朵花淺色，唔想透色出嚟，其實先上一層白色就得，不過想試吓咁 work唔 work啫。

第二層係 outline，完成咗幅畫就唔要呢層。

第三層，畫埋 d cast shadow先。

咁睇真係好簡陋😁

第四層係上色。

我見人哋上色都分幾層，可能分唔同部分，又可能分主色同 hi-light，但我開始畫已經唔記得咗要分，好幾次仲畫咗去另外其他層添，好彩有得 undo。

簽名都霸一層😁

畫畫 – 復活蛋（procreate）

我畫水彩、木顏色都畫到好淡色，估唔到連用 procreate都係咁。

畫畫 – mushrooms （procreate）

本來唔係好諗住用電腦畫畫，不過最近換咗部新 iPad，唔用嚟寫吓字畫吓畫好似有 d嘥，所以 down咗 procreate嚟試吓。

玩咗幾日，仲未好識用 d brush，不過都幾啱我，起個稿擦到紙都霉，呢個 app就可以畫到啱為止。

暫時覺得最啱用嘅 brush係 peppermint同 chalk，hi-light用 shale brush，底色用 soft brush。

分開唔同 layers都好好用，唔啱可以成層 delete咗佢，不過我好多時會去咗唔啱嘅 layer畫，要習慣吓先得。

呢幅用咗五個 layers，底色用咗兩層，因為畫完發覺唔夠深色，於是 duplicate多一層出嚟，😁真係方便。

Juan Martin del Potro announced retirement

尋晚 YouTube忽然彈咗條片出嚟，係 del potro宣佈退休😧，感覺有 d突然。

其實佢退休都應該㗎喇，呢兩年都因膝傷比唔到賽，感覺突然係因為早兩日先睇到佢話準備好復出啫。

不過佢喺 press conference話，嚟緊嘅比賽 rather than話係復出不如話係告別😔

告別賽係啱啱開打嘅 Argentina Open，一個 atp250 嘅賽事，佢覺得喺自己國家、自己嘅同胞面前告別最適合，不過我就覺得少少遺憾，希望佢嘅告別賽有更多 atp高手嘅參與，but anyway佢本人嘅感覺先係最重要。佢第一圈比賽對手咁啱都係 Argentine，應該係巧合，抽籤㗎嘛，好有可能第一場已經係最後一場，早幾日見過一段練習嘅片，見佢都唔係活動得幾好。

佢喺個 press con喊咗啊，我都睇到喊，真係好傷心，he has been training in his whole life for this sport，最後喺咁嘅情況下退休，好似浪費咗一生咁。幸好，喺佢比較健康嘅日子，佢都攞過 us open，有一個 grand slam都算對佢嘅努力同運動生涯有個交代，大部分球員一生都攞唔到一次。

btw，你諗吓，rafa，Federer，Djokovic加埋攞咗 61個 grand slam，超過 15年嘅總和，期間只係漏咗幾個出嚟😂，攞到嗰幾個真係好犀利，不過又btw，我一向唔覺得 Wawrinka有幾犀利，但原來佢如果攞埋 Wimbledon就有埋個 career slam，真係唔覺唔覺咁⋯😂

講返 delpo，佢喺咁嘅情況下，都可以喺同一賽事贏到 rafa同 Federer攞到 champion，更加覺得佢嘅生涯係幾咁令人婉惜。

我總係覺得太高唔適合打網球，應該話除咗打籃球，太高真係唔好，關節同骨好似會脆弱 d咁，尤其係太瘦嗰 d，好似 Medvedev，應該多番 d肌肉幫手 hold住關節。

不過 back to real life，33歲仲係好年青，仲可以做好多嘢嘅，wish him all the best。

~*~*~*~*~*~

最後一場成積，16 36

賽後訪問，佢話：I gave it everything until the last point, and today I wish sleeping without pain in my legs.

水彩班 03 Jan 2022 – 黃昏、雪地、倒影

天空用 lemon yellow同橙色，
最重要係： 太 陽 一 定 要 留 白 。

太陽以下用 Prussian blue加紫紅畫樹叢，伸到太陽以上加少少橙色。

雪地，仍然係 Prussian blue加紫紅，（調色真係神秘，上一堂嘅山、呢堂嘅樹同雪，完全唔同色，但其實都係呢兩種色溝出嚟，比例唔同、水份唔同，加上筆同調色盤嘅殘餘顏色，效果完全唔同，以我嘅技術，好難溝番一樣顏色，所以如果大面積上色，一定要溝定多 d。）
阿sir話，散出嚟嘅雪正面要平d，咁會顯得遠d。（等我仲特登畫得咁岩巉，以為有d變化添😳）

水上陽光反射同天空一樣用 lemon yellow同橙，不過要加少少 vermilion。
趁濕用樹枝色加樹枝倒影，再橫向刷出水波紋，呢個一定要黃橙都未乾時做。

去到最後階段，重點都喺個太陽度。太陽留白圈裡面嘅樹枝用橙色，外圍用 Prussian blue加紫紅加 brown，用啡色嚟過渡。（我畫畫吓將啡色遮晒，變咗冇過渡色，少少突兀）

雪地上嘅草要乾濕混合；

雪地邊緣加暗位表現厚度；

雪地下面嘅水記得加深色先有立體感。

今次阿sir喺我幅畫加咗太多喇，我真係唔可以話係我嘅畫，我應該會再畫一幅。（希望啦，呢兩個星期畀一部網絡小說佔據晒所有時間，篇小說又長到一個點，睇極都未到尾，真係欲罷不能。）

阿sir話顏色過渡好重要，記住彩虹嘅顏色，唔好跳過直接去另一隻色，要加色過渡。

姑且 post咗呢幅先啦⋯

Rafa's 21st Grand Slam - the Australian Open 2022

Rafa 終於贏咗今年 ao，26 67 64 64 75，對手係 Medvedev。

佢舊年又做咗手術，似乎好嚴重，嚴重到諗住：『真係回復唔到狀態就退休啦』，甚至champion speech佢都話今次可能係佢最後一次嘅 ao。捧杯畀記者影相嗰陣，佢落個台下面，其實個台好矮，但佢落地嗰吓痛到面容扭曲。

同 2009一樣，打足五盤，五個半鐘，當年又係膝頭痛住嚟打，ao對佢嚟講真係太難。

冇留意其他比賽係點，但每次睇 ao頒獎總係見到球員要企喺班 committee同 guest後面等佢哋講一大餐，都唔諗吓球員經過幾個鐘劇烈運動需要休息，仲要即刻冇得舒緩就咁企定定，做過運動都知咁好辛苦，有一年 rafa同 djokovic攰到忍唔住原地扭擰，坐喺個網邊度借力，好彩後來都有人搬兩張櫈畀佢哋，今年 rafa企企吓都有人送櫈過去，好心一早準備定啦。

辛苦成咁，要幾強嘅意志先可以由落後兩盤堅持到贏咗？佢好似年年都要做手術咁，可能真係應該退休喇，三個之中，佢真係比較多傷，好早好早已經有人話佢嘅打法唔會打得耐，佢就反駁話：『你哋都睇到我仲打緊』，的確係，都三十幾歲，已經比早一輩嘅球員都堅持得耐，仲（好似）年年都攞到 grand slam，但若然同 Federer, Djokovic相比，尤其係 Djokovic，年紀、獎項相約，但感覺 Djokovic比 rafa健康，而 rafa個樣，唉，殘到呢⋯

不過佢哋一日仲打到波，應該都唔會想做首先退休嗰個，一退休各種數字都會畀人拋離，會受不了。

嘩，佢今年件 Jacket，😓😓😓😓😓

究竟 nike點諗到咁肉酸嘅 design同顏色嘅呢？

終於，第一次領先 grand slam數字。
相信 Federer追上嘅機會唔大，但 Djokovic好有 potential，佢嘅 problem一向都嚟自佢內心，如果調節到，好大機會追過 。（好廢話😂）

龐加萊回歸 Poincaré Recurrence Theorem

假如一個原子可以回復初始狀態，宇宙中每一個原子同一時間回復到初始狀態都肯定會發生，只係或然率嘅問題，曾經發生嘅都會重覆發生，亦即係輪迴。

Albert Einstein喺佢朋友 Michele Bresso離世後，安慰佢家人話： 

『現在，他比我稍早離開了這奇異的世界。這不代表甚麼。像我們這些信仰物理的人都知道：過去、現在、未來的差異，僅是一種堅固持久的幻覺。

Now he has departed from this strange world a little ahead of me. That means nothing. People like us, who believe in physics, know that the distinction between past, present and future is only a stubbornly persistent illusion.』

有人又咁安慰人，『親友離世唔好太傷心，當原子返到初始狀態後，失去嘅又會返嚟。宇宙中，輪迴可能已經發生好多次。』

但係，你對上一次輪迴有記憶嗎？冇，就即係上次同你無關，就算同一個肉體，都係另一個人。緣份，一生人就係呢一次。

原子歸位，宇宙重置，走向仲會同上次一樣？你仲會認識同一個人？你父母仲會認識然後生咗你？你祖先仲會結合生咗你祖父母？

原子回復嘅初始狀態究竟係邊一個點？會唔會未去到我存在嘅點又重置咗？

部分重置又會點？

我從未試圖認識同了解相對論之類嘅嘢 ，我知道會諗到黐線（然後都唔明），以上只係我偶然聽人提到 poincaré recurrence theorem 而嚟嘅問題。

無論有幾多次輪迴，有幾多個平行宇宙，帶住呢一套記憶嘅就只有呢一生，呢一次嘅我。

即係呢，回收個膠樽，造咗個背囊，裡面唔會裝水囉，就算係都唔係嗰⋯堆(?)⋯水囉。

（夾硬將呢篇歸類去『靈異』，第時有更合適先改啦）

Djokovic, AO2022, pandemic

冇留意網球好耐，如果唔係週圍都講緊呢件事，都唔記得又到咗澳網嘅日子。

Djokovic會唔會係畀呢個 pandemic影響最大嘅網球員呢？舊年佢班機有 confirmed case令佢要隔離 14日，今年更嚴重，佢冇打疫苗畀澳洲政府驅逐出境（deportation），衞冕唔到，失去咗攞第10個 ao，第21個 grandslam嘅機會，仲好似話三年內都唔畀入境，omg！

有冇可能連法國、英國都唔畀佢入境？ 雖然大家都明知疫苗根本追唔上變種，但各個政府都係咁迫人打疫苗，佢會唔會為咗參賽屈服？

聽聞佢已經感染過兩次，都仲身壯力健，似乎隻病毒嚟到呢個階段，都係好似感冒咁啫，仲有冇需要咁緊張？其實好多國家都畀某d人士 exemption，譬如西班牙，如果個工作冇呢個人開唔到工，就可以豁免，而運動員係其中一種。（喺網上報導Djokovic新聞時睇到，冇FC過）（nicole kidman都係咁嚟咗香港啦，不過澳洲人出嚟抗議，個政府又聽啫）

我覺得佢衰在太高調， 攞到 visa靜靜地入境打波就好啦。

但又牽涉到有虛報，去過西班牙又冇報，hpmmp⋯，

要四圍去、接觸好多人嘅人係好難避免各種世俗嘅規範，雖然我唔係鍾意佢，但都支持佢堅持自己嘅信念。

但係佢周圍嘅人就唔係咁諗，就算球員之間都好多人冷嘲熱諷，只有一個女球員出 post支持佢，話佢一向都企喺球員嗰邊，⋯。

（又係冇留意詳情，唔記得邊個，唔知佢仲講咗乜）
（唉，乜都冇留意就唔好出呢篇 blog啦）
（諗諗吓又想講吖嘛）

佢2020個 event又真係幾錯嘅，疫情剛開始，大家都小心翼翼，fo改期，Wimbledon直情取消，佢仲咁大膽嚟個 adria tour，無論有冇出事，都係引火自焚。

～*～*～*～*～

今年 ao冇 Djokovic，rafa會唔會有機會？唔知佢恢復到未，但Medvedev、tsitsipas都係好強嘅對手，冇 Djokovic，都唔一定到 rafa。

Federer仲養緊傷，好似話連 Wimbledon都唔知去唔去到，嘩，好嚴重喎。

所以最有機會突破 20 GS嘅就係 rafa喇，經過種種事情，我對 rafa已經冇咁熱衷，不過睇到有人創造歷史都係好激動人心嘅。