畫畫 - 乾花（木顏色）

成日想試吓畫身邊嘅嘢練習速寫，但屋企亂七八糟，落唔到筆。
上幾星期忽然諗：不如畫樽乾花啦
但我用咗木顏色畫，始終我都係鍾意有顏色。
樽乾花好簡單，咁我又好簡單咁畫，於是結果又係好平淡。


前兩日，睇番幅畫，唔知點解好有mood，加吓加吓色彩豐富咗好多。
雖然個玻璃樽都係畫到好死板，但喺冇reference之下都畫到出嚟，我對自己都好滿意喇。

Polychromos on paper

水彩班 2018-5 - 粉紅玫瑰

我覺得玫瑰花好難畫，因為好難分清楚每一片花瓣，不過牡丹仲難，花瓣多又軟，每一片都前仰後合咁，睇都眼花。

今堂只係畫一枝玫瑰，最難係個花心，花瓣密集，捲埋一堆，外圍就容易好多。

我見人哋畫玫瑰都係由花心開始畫，但係我驚控制唔到朵花嘅位置，就由個花托位開始向上畫，我諗由花心向外畫會畫得自然d，下次試吓。

都唔記得睇老師點起稿添....

畫完第一層，今堂好似唔係好著重縫合，見老師都似係渲染多。

好彩唔需要重疊太多，只係暗位要加深強調形態。

d葉畫得冇乜神采，冇明暗，仲好似唔係好啱size，成枝花都好似唔係好合比例，怪怪哋。

呢朵花只係用咗一種紅色，冇用對比色，只用水控制濃淡，所以顏色可以保持清新，一加對比色就會濁。

我成日都畫唔出『水』嘅感覺，好『實』，但我見老師好多時都點咗顏料直接畫，佢畫出嚟都好『水』架...

不過而家睇番，我今次都唔算畫得太實。

Shinhan on Saunders Waterford 190g rough 11"x15"

黃玫瑰
https://iceefaery.blogspot.com/2017/08/4.html
紫玫瑰
https://iceefaery.blogspot.com/2018/06/blog-post.html

Pokemon Go

呢編post舊年八月就寫咗，寫完又就唔記得咗佢，啱啱先見到，
所以下面講嘅update其實已經大半年前喇。

~*~*~*~*~*

最近個major update之後，我發現香港人嘅質素原來真係唔高，或者話，原來有好多質素好低。
小小事就喺facebook page出post鬧人，好多仲係出於無知，自以為是、自我中心咁講晒粗口鬧人，好多時睇網上論壇都好多粗口，但冇諗到連一個遊戲嘅facebook page都係咁。

有人捉唔到神獸又嚟鬧n記，話佢哋唔想畀人捉，只係想呃人課金。
講到課金，好多人鬧n記，omg，人哋開發個遊戲都係為搵錢啫，唔通為興趣？慈善團體都要收番行政費啦，玩得咁開心一百幾十都值啦係咪？睇場戲兩個鐘都要錢啦係咪？

有人打完gym手慢畀第二隊坐咗入去，就話飛人搶佢個gym，點搶呀？飛人都要打完有winners' priority先坐得啦。星期五晚喺旺角都可以話『明明』得佢自己一個打喎，有飛人喎😆

有人自己個電話唔掂，就鬧n記個game唔掂。

有人交咗raid pass入去話佢time's up，就鬧n記呃佢錢，原來有d人鍾意將個時間較快d呃自己，冇乜時間喇動作快d啦😆，或者以為遲到原來冇遲，.....😳

但最多、同埋一直持續鬧嘅，就係有人打raid battle用唔啱屬性唔啱技能嘅精靈，同坐gym用低cp精靈。唉，人人對待遊戲心態都唔同，同各種人組隊玩都係遊戲嘅一部分嘛，點解人哋玩法同你唔同就要鬧人呢？識唔識尊重吓人哋嘅自由呢？又唔係影響社會影響民生，連玩個遊戲都唔可以離經叛道玩吓嘢？冇錯n記係叫你坐館攞金幣捉神獸，但有需要咁聽話？咁似係畀遊戲玩多d😂

呢個game好多人玩，但我相信大部分都唔會上facebook，亦未必會去呢個page，佢哋唔會知道原來有人日日喺度鬧佢哋。佢哋未必係想玩嘢，可能只係唔知有乜分別，出邊隻精靈都係隨意。呢班人玩得幾開心，我覺得咁先係玩。我唔知我應唔應該後悔加咗個page，知道有人唔鍾意，我下意識都唔會畀自己咁做，始終都唔想畀人鬧，主要係我自己都係想贏好隨俗嗰種，咪跟番世俗d嘅玩法囉.....

相信鬧人嗰班喺現實世界唔會係咁乜都鬧，會體諒忍讓保持儀態顧存大局，但嚟到網上世界佢哋就解脫放任，唔需要好似喺現實咁乜都要忍做個規矩嘅好人，咁有人喺現實中已經為學業事業生活家庭循規蹈矩努力咁衝，去到遊戲世界想hea d放肆一d，點解就要畀人鬧呢？遊戲嘅目的唔係畀人平衡番生活壓力嘅咩？點解仲要當日常生活咁去衝，去斤斤計較呢？

然而當我以為鬧人亂出精靈已經係極品，尋晚竟然有人投訴人哋晚晚霸晒 d gym過夜，真係笑死，點解會有人咁不明事理、自我中心架？仲要愚昧，連個game點玩都唔知咁。其實有樣嘢都發現咗好耐，就係呢個game係大叔大嬸玩多，一係就小學生，都唔可以對玩家有乜expectation喇...


~*~*~*~*~*~

ingress冇咁多叔叔嬸嬸，玩家中都有幾多大學生，但一樣有唔少蠻荒嚟嘅人，
話人哋link得少，唔夠佢玩得有規模，叫人唔好link，阻住佢喎，
佢咁同連鎖店趕絕小店有乜分別？
個遊戲人人都有權玩，佢係玩得有心機，plan好晒，但timing都好重要，邊個叫你失咗先機？

唉，野蠻人實在太多。

不過，又真係有人好奴性好服從，人哋叫佢只喺一個 area之內玩，佢就不單止自己聽話，仲會去幫手管埋其他人添，美麗新世界需要呢種人 😆

~*~*~*~*~*~
有時返去單機玩牧場物語，安安靜靜。

動物森友會…，好似幾得意，不過 d動物個樣唔可愛。

水彩班 2018-4 - 牛角包

今堂畫得好順利，一個鐘就畫完。
老師揀嘅圖全部都係可以分開一格格畫，畫嘅時候唔使兼顧各方位接唔接得上，容易好多。
但我都係可以畫到格格唔同色，雖然都係用嗰幾種色，但比例唔同出嚟都有分別，唉....
好彩用色唔複雜，都容易救番，但重疊仍然難免。

以前老師會逐個巡，主動糾正我哋，今個course佢只係坐喺位，同學自己去問。
我一向都好少問，因為其實我d問題都好明顯，自己都睇到。
但今堂我見咁快畫完，又咁多人問，我又去畀老師睇吓。

老師話陰影太冷，要暖番小小，叫我加d橙色。
我番到屋企諗起，唔係話物件暖色，陰影就要冷色咩？
我唔會問老師，我驚我講嘢語氣唔好，老師會以為我挑戰佢，雖然老師係一個平和嘅人，但我都係唔敢。
唯有再留意吓以後點講啦。

仲有就係前面個包嘅邊太平，少咗立體感，
呢點呢，通常我畫完擺低一陣，就會睇到，
其實好多問題喺畫緊嘅時候係唔覺架，要放低，當幅畫唔係自己嘅，問題就會浮晒出嚟，
係咪反映我做人唔理智？

堂上大致完成，有時間會修吓，主要係個影，個包都會加番小小色。
後面個包小小似浮起咗，可能係因為影同包嘅接位淺色，我會加深d，等佢坐番低。

老師話個影要加橙色，雖然我有疑惑，但本著『老師永遠是對的』嘅心，我照加。
果然，加咗橙色，個影。。。唉
我諗....老師係話調色嘅時候加橙色，而唔係on top加上去........

Shinhan on Saunders Waterford 190g rough 11"x15"

2017 都畫過，一比較就睇到有進步，好開心。
https://iceefaery.blogspot.com/2017/05/4.html


睇番上次，有用紫紅，但今次冇，反而喺包嘅暗位用咗微量綠色，令個啡色更暗。
相信老師用色都係睇心情，亦即係話畫畫用色唔需要拘泥，調色唔係一成不變。

與神同行 신과함께

聽sl講，係一部由頭喊到尾嘅戲，所以我帶定一包家庭裝紙巾去睇。

其實喊位好分散，中間又有笑位，所以都唔係喊好多。

成套戲都好漫畫，我唔覺得好好睇，只屬可以一看。
劇情畀幾個地獄分成一節節，情緒好抽離，冇乜邊個情節係印象深刻，
每個地獄嘅設計都大同小異，第一個幾特別，再睇已經冇乜嘢，
不過，聽講係用咗好多製作費，造出hollywood級嘅cg效果，
可能我睇戲比較集中睇情節啦，一向對背景冇乜留意（就好似我對生活中嘅週圍環境冇乜感覺一樣），但如果背景唔得，又真係會影響投入度，所以....如果我冇覺得背景唔協調、唔真實，咁即係個設計已經係work嘅，達到咗襯托劇情嘅效果。

不過劇情又幾前言不對後語，最嚴重係，話主角要經歷49日7個地獄審判，無罪先可以報個夢畀阿媽，但點解細佬又輕鬆報咗夢？
點解細佬會有咁大嘅超能力？
唔係好make sense，睇落有小小突兀，影響投入度。

最特別係每個角色個妝都好光滑，韓國化妝真係掂。
除咗個細佬啦，造型又太難睇喇，不過都係化妝啦。

好多人都話套戲好，好似好hit，唔知同而家流行韓風有冇關係。
以前係香港電影風靡韓國，而家，香港電影已經式微（係呀，唔通王晶嗰d都算好電影？），風水輪流轉。

套戲最後係話，有d事情，點解唔喺仲有時間嘅時候做，係要等到冇時間先嚟後悔？

水彩班 2018-3 - 蓮霧

上一個course畫蓮霧好失敗，完全畫唔到。

今次好留心咁睇老師示範，記住要用嘅顏色，同埋畫法。
老師亦好詳細講明用乜嘢色，最重要係佢提點咗我哋有乜嘢要注意，邊個位一定要畫到，邊d位唔需要太仔細，連落筆走向都講到。
雖然睇完示範就走咗，仲隔咗幾日先畫，但都仲記得好清楚。

第一個都唔係好順利，形態同筆觸好生硬（其實後面幾個都係）。
唔知點解，雖然起咗稿，亦事前決定咗用邊幾種色，但畫嘅時候總係莫名咁忙亂起嚟，經常點咗其他色，搞到幅畫顏色奇奇怪怪咁，今次我用膠紙label住要用嗰幾種色，一點錯就知道（係呀，有label都係點錯），不過幸好呢幅畫構圖同用色簡單，如果唔係，要用嘅色太多亦一樣會錯.....，anyway，今次好work。忙亂好大原因係驚顏色乾咗，下一筆接唔番，聽講waterford係快乾，或者以後試吓其他牌子啦。

留白唔算好成功，但亦失敗唔晒，總算表現到反光，
雖然重疊咗唔少，但可能用色簡單，係厚厚咃，但都唔係好濁，算keep到水彩嘅清爽。

老師嗰幅冇畫葉，但我覺得太單調，畫埋嚟做背景，
冇示範就係差d，顏色冇變化，實咗小小。

Shinhan on Saunders Waterford 190g rough 11"x15"

Miss Marble 雲石小姐

今年生日，sl訂咗個好潮嘅雲石蛋糕畀我。

嘩，嚇得我吖...
好似中咗幅射咁......

well....
可能係我嘅審美觀有問題啫，我見好多人鍾意.....

一切落去，咦...好有彈性喎....
厚厚嘅一層，平均厚度有1cm，
咬落韌韌哋，
食落甜甜哋，
兩種屬性都冇乜嘢....但我個人覺得....好嘔心，
same did sl，
我哋決定唔食層....雲石。

個蛋糕本身.....
本來都ok嘅，好似係伯爵茶味，茶味都好明顯，蛋糕嘅質地唔算鬆軟，但都係個合格嘅蛋糕。
可惜，佢係一個流心蛋糕，
我自己覺得，流心要杰小小，唔容易浸濕個蛋糕，
濃小小，先有一種好味到沁出嚟嘅感覺，
但佢嘅流心係淺奶茶色，稀稀咁，一切開瀉晒出嚟......一灘水咁，浸住個蛋糕，imagine，濕嘅蛋糕！味道亦唔濃郁，完全冇提升到個蛋糕，唔知佢為乜而存在。

個蛋糕，計埋成1 cm厚嘅雲石皮，都唔知夠唔夠6 吋，成323蚊，3 蚊咁伶仃？就係插住嗰個紙牌。
呢個價錢，買到1磅cova蛋糕喇，佢嘅質素點同cova比？！
ok，潮流唔可以咁衡量。

網上搵番資料，話雲石層係溶咗嘅棉花糖，
...棉花糖？真係唔知棉花糖溶咗凍番會係咁嘅質感，有彈性、光滑、有小小，小小透明感，
哈哈哈...光滑、有彈性，小小透明感，完美肌膚嚟喎，雖然唔好睇唔好食，總算有個好嘅寓意啦。


~*~*~*~*


後來我去佢哋 fb留言，佢話我應該即場講，佢會即場整過個喎，
第一，我就唔信即場整到啦，我要等幾耐呢？
第二，個外觀咁差，佢哋都交得出嚟畀個客，同佢講佢哋會服氣再整過咩？
第三，係個『流心』都有問題吖嘛，唔通要切開驗？
我話『你哋攞得呢個 product出嚟做生意，品質應該要有一定穩定性，而唔係要個客踫運氣。』，因為我睇到有人嘅 tg話佢個『流心』硬晒唔流，而我嗰個就好似水咁。
其實我都係想畀 d feedback等佢改善吓啫，錢又畀咗，蛋糕又食咗，又唔係要佢賠，
點知佢答完就刪咗我個 post添，tg 嗰位都有講畀佢刪 post。

初時我以為佢係網上接單自己喺屋企整蛋糕嗰種小店，後來先知道佢哋係有店面嘅正規餅店，仲好好生意添，一d都唔似，唔講蛋糕本身，就算盛蛋糕嘅膠托都冇整乾淨，有好幾撻灰黑印，同細碎黑點，我安慰自己係雲石紋嘅黑色物質啫，乾淨嘅乾淨嘅…。

你標榜 fancy架嘛，整到咁嘅質素都有生意，我只可以話小女孩都好好呃囉。


～*～*～*～*～*～*～

前幾日喺 Facebook蛋糕關注組見有人出 post介紹佢個燒雞(?)造型蛋糕，我留言話佢呢間店曾經令我好失望，唔會幫襯。第二日我再去睇吓其他人有咩 comment，點知發現我俾人 block咗😏，我本來都估嗰個係阿雲石小姐自己出嘅宣傳 po，佢而家用番同一技倆我就更肯定。

唔肯面對自己嘅問題，唔肯了解顧客嘅反饋，但佢都做咗咁多年，真係莫名其妙🤷。