我都唔知有冇跟到光暗上色，d花瓣前仰後合咁，睇到精神錯亂，連老師都要每筆定神睇好耐，我畫完仲有光有暗都算係咁啦。
花萼用....綠色，唉，其實我番埋位就唔記得咗老師用乜嘢色喇.....，大概記得佢用過邊 d色，再調番差不多咁，不過實際效果都差幾多架....
我又唔記得應該幾時加底色，咁自己諗囉，
呢幅畫底色好重要，要用底色勾番花瓣嘅形狀出嚟，一畫錯就會破壞朵花，我都係畫多一陣，捉摸到我朵花嘅形態先加底色穩陣 d，我而家都未知我朵花會係點樣，因為我冇跟足圖片，唔係我夠 creative，而係跟唔到。
個花芯我畫得太大，花萼畫平咗，左邊排花瓣畫細咗，又唔記得化開，老師示範係化開架，尾端 fade out，唯有跟住嘅 steps補救啦。
底色只係朦朦朧朧，跟住要實在咁逐塊花瓣畫番出嚟。
初步完成咗嘅幾片花瓣都幾立體，mmmm......，堂上畫唔晒，我都唔肯定當時用咗乜嘢色，唉😄
不過，d花瓣總算用咗隻好啱嘅色，環顧其他同學，多數嘅黃色都唔夠鮮明，點解呢？其實 cadmium yellow正正就係向日葵色啦。
果然溝唔番用緊嘅色，仲 pick up唔番嗰道氣添😆，好似唔識點繼續畫落去咁。
但其實番埋位落筆就發現自己唔知道應該用乜嘢色，就算係自己決定用色，過咗幾日一樣唔記得，可能因為我決定用色係冇乜邏輯，純粹睇當時心情啦。
好彩我個 palette顏色唔多，儘量溝隻接近嘅色啦……
左邊堆花瓣理唔清，由得佢啦，畀 d明暗就算，都好似唔錯。
溝咗隻深綠畫花萼，畫番少少細節，老師示範係模糊咗呢 part，但我唔係好接受到😄
底色本來都幾好，忽然見到一撻化得唔好，忍唔住加少少色，唉，早知道會咁，加咗仲衰。
真係要注意吓畫底色嘅筆觸，次次都放射咁尖尾向四邊，好生硬又冇美感。
老師示範好多處都化開，但我控制唔到，總係會跟足圖片，搞到輕重不分，
不過下面 d花瓣連圖片都朦朧，所以我先畫到😀，一幅畫有清晰有朦朧真係靚好多。
 |
| Cotman on Saunders Waterford 190g rough 11"x15" |
沒有留言:
發佈留言