老師首先鋪水畫上半部，天同遠山。
有一點一向都覺得好神奇，就係老師幅畫冇咁容易乾，佢畫好多處，仲要講解，番轉頭 d色仲未乾，仲好容易暈開，而我哋呢，慢少少就乾咗暈唔開。但今次，終於見到老師都係咁，當然，佢捽幾吓加幾筆就搞掂咗。佢呢期轉咗用 block，不過仍然係寶虹。
我哋都有諗過係紙嘅問題，轉用過 bockingford，但唔覺得有幫助。點解唔試用寶虹呢？mmm....因為就算解決到快乾嘅問題，都會有其他唔習慣嘅問題，而且我好鍾意 waterford嘅 texture，都係盡量適應快乾嘅問題好 d。
老師喺雲嘅底部加紫紅色，令舊雲有立體感。我一向用灰藍色，因為覺得雲有紅色唔係好天氣😆，但效果的確係比較悶，雲朵有小小紅，色彩豐富 d，who cares 聽日落唔落雨😇
遠山用灰紫，遠處嘅樹都係偏灰，我覺得呢層遠處嘅樹係全幅畫最難畫嘅，上完色太實，化開小小又太淡，再上色，再化開.....，老師話我個灰色太灰（係呀，加多咗藍），於是又上多一層墨綠，而家感覺好厚，冇咗遠處虛虛嘅感覺。
前面嘅草地就容易好多，黃黃青青啡啡，分層之餘又混雜少少咁。
蘆葦都幾難，老師壓到枝筆叉開嚟畫。好彩我都有呢枝筆，我唔捨得咁對枝 sable囉...
（講開呢枝筆，老師話生產商話係狼毛，但佢估其實係狗毛.....😱😱😱omg....，又係嘅，10蚊枝，想點？）
我本來以為枝筆要好乾，原來太乾又會上唔到色，但顏料多咗又會好容易畫實咗出唔到一絲絲，咁就冇得救，所以我每次點咗顏料都要喺廢紙上試筆，老師當然唔使啦，但同學都冇咁做架，我見佢哋連試色都唔使，好有信心架。
唔記得咗老師用乜嘢藍畫水，於是用咗隻暗少少嘅藍，好似都係明亮咗 d....，d倒影畫到亂晒，尤其是 d雲都唔啱位，後來發現連最主要嗰棵樹都歪咗，😆真係吖，畫到心仔都亂晒。
到最後，畫最前面嘅蘆葦，老師話重點畫幾枝就可以，要疏密有緻，有高有低，但我畫畫吓，又係一排咁。
呀，正中棵樹先係最後，呢棵樹唔暈開，用乾筆，小心畫就唔算難。
都畫得好快，堂上初步畫晒。老師一睇，原來我畫漏咗一層樹，同水面嘅蘆葦，棵樹要加番密少少，而家太細碎。
我自己就覺得前面嘅蘆葦太綠，同埋冇層次，要加番 d墨綠同深啡（希望啱色）。
要加嘅都加咗，後加嗰層樹好矮，因為畫後面嗰層冇留位，而且顏色又深又厚，冇辦法。
水中間嘅蘆葦畫嘅時候覺得好敗筆，估唔到畫完效果都唔錯。
·
好靚。
回覆刪除