水彩班 13 Dec 2021 – 山巒

今次畫一望無際嘅山巒，網上好多呢種圖片，畫法真係豐儉由人😂，我未學水彩時都畫過，冇細節，純用色彩表達距離，由淡色畫到黑色，但阿sir梗係唔會教咁簡單嘅嘢啦。

一連串嘅山峰，有雪有雲霧，仲有投影（初時睇唔出，係示範時阿sir講先發現），對我嚟講，咩畫起稿都好難，比例硬係唔啱，要跟住曲折起落嘅山峰山巒更難，我以為畫到大致山勢同一層層就ok，但原來阿sir教嘅細緻好多，起碼係各處都有不能忽略嘅重點：

光嘅方向；

每層山嘅分佈；
每座山巒嘅大致起伏；
每個山峰嘅特別形態；
分辨雲同雪，雲要暈開，雪要留白，邊緣係實嘅；
分辨山嘅暗面同投影，暗面會消失喺雲霧裡面，要暈開，投影係實邊。

幅畫主要用 Prussian blue，加少少紫紅調暗d，由遠到近逐漸深色。

第一層底色，積雪要小心留白。
第二層用色濃d，畫暗面，光暗交接位筆觸要 sharp d；暗面大量用乾筆刷白。有同學用 hot press紙，刷白唔到，畫到好困擾。所以畫風景都係 rough最好，不過我都算全天候用 rough，好鍾意睇索咗顏料嘅紙纖維😂，算唔算怪癖？
第三層用更深色嚟強調，Prussian blue唔夠深可以加啡色。

阿sir示範好快，但我哋畫咗好耐，尤其到最後，各有各問題，
刷唔到白，個山冇咗明暗同立體感；
留白唔見晒；
山峰位置、比例、形態唔啱，有d細節畫唔到，影響構圖趣味；
忽略咗大局嘅明暗位，托唔出山勢。

兩年冇上阿sir堂，佢教法唔同咗，以前佢唔會落筆畫我張畫，但呢兩堂佢都手起筆落，大筆一揮咁同我改。佢仲多咗件神器，就係一枝『洗刷筆』，有同學畫得重手咗，加筆補救唔到，佢就出動神器，刷走 d色，真係有備而戰。得到阿sir真跡我梗係開心，改過嘅畫又靚好多，但以後睇番好容易誤會自己真係畫得咁好，而且變咗唔完全係我嘅畫，i'm desparately in love with my work，畫得幾難睇我都當寶咁留住😆，勤力嘅同學會畫過幅，但我每次重畫都差過第一次咖嘛⋯

今堂好論盡，個 palette未 setup好，每種顏料都係得一小點，今次用大量 Prussian blue，嗰一點唔夠用，最後要借用同學嘅顏料。

Cotman on Saunders Waterford 300g rough 15"x11"

前面最深色係阿sir加嘅，唔知點解係佢加先深到色😓。

阿sir話左上幾條山脈嘅線太一致，不過我唔改喇⋯，我一向都係愈改愈差😓

梅里雪山，卡瓦格博峰？？