水彩花卉風景 2018-5 - 花樹

今堂畫嘅構圖好簡單，不過就示範好幾種佢以前冇特別點明嘅畫法，睇過都唔上心，今次就會記得以後用。


一棵有好多枝椏嘅大樹，樹上有好多好多小花，整濕畫紙渲染天空後，趁半濕用噴灑嘅方法畫花，乾咗再灑一層；畫樹幹唔好一筆過好流暢咁，要停吓畫吓，好猶豫咁（我覺得）。


對岸遠景，先淡淡上一層，用筆或布印走一啲，用濃小小加番一啲，咁就會迷迷離離，隱隱約約。
水面用淡淡橫線，喺留白位下面加深色，就會出現水波紋。
草地唔好單色，上完色用畫筆尾畫紋，顏料會聚喺坑紋裡面，深色咗。
海岸線必須平，水平，老師仲建議冇信心就用尺間住畫，嘩，好似真係好重要咁。


呢啲都係幾一般嘅技巧，唔係冇見過，不過好多時都唔記得運用，呢堂老師將佢哋集中示範，提醒咗我哋。


睇完示範，發現咁簡單嘅稿都係起得唔好，因為圖片嘅草地佔好少位置，樹腳嘅位置唔係好靚，雖然畫嘅時候都覺得個比例唔係好自然，但都係一成不變咁照畫，然而，老師就係話構圖唔好，佢將草地加大，將樹擺上啲。我仍然可以照圖畫，但改咗效果係好啲喎，明知唔好都跟，好嘅反而唔跟咩？於是要改啦。
見老師用細筆畫小枝椏，我枝筆筆鋒雖然都可以好尖，但畫咁多我驚一吓手震畫粗咗就救唔番。
又要再起稿，又冇帶啱用嘅筆（其實都係藉口啫），而且，覺得好攰，課室嘅燈光令我眼都花，決定唔畫番屋企。

個海最敗筆，忽然唔知點畫好，深色咗，線彎咗，顯得好大浪咁，同成幅畫個mood唔係好夾。
喺台灣買嗰枝動物毛細畫筆終於用得著，用嚟畫幼樹枝同點花。
草地我冇用老師嘅做法，我覺得咁d草會有雜亂嘅感覺，刮咗幾吓，我都係用番筆畫上去。
sl話花唔夠密，好似開始要落花嘅感覺（唔可以似預備綻放咩？），anyway，我都會試吓加多d花，...咁地上係唔係應該有d花瓣呢？

Cotman on Saunders Waterford 190g rough 11"x15"

唔知係唔係學咗咁多個course終於都有進步，今期覺得容易咗，唔係話自己畫得好好，但都算見得人。